ბათუმის პოლიციის ყოფილი უფროსის, ირაკლი დგებუაძის ქონებრივი დეკლარაციები ანტიკორუფციული ბიუროს ვებგვერდზე აღარ იძებნება. ამ დროისთვის დგებუაძე შსს-ს ორგანიზებულ დანაშაულთან ბრძოლის მთავარი სამმართველოს უფროსის თანამდებობაზე მუშაობს, მანამდე კი საერთაშორისო თანამშრომლობის ცენტრის უფროსის პოზიციაზე მუშაობდა.
ირაკლი დგებუაძემ ბათუმის პოლიციის უფროსის თანამდებობა 2025 წლის სექტემბერში დატოვა.
მაღალი რანგის საჯარო მოხელის ქონებრივი დეკლარაცია საჯარო უნდა იყოს მისი გათავისუფლების შემდეგაც. კითხვაზე რატომ არ იძებნება დგებუაძის ქონებრივი დეკლარაცია, ანტიკორუფციული ბიუროს ვებგვერდიდან მოგვწერეს, რომ ინფორმაცია ოფიციალურად, წერილობით უნდა გამოვითხოვოთ და კანონით გათვალისწინებულ ვადაში გვიპასუხებენ.
ამავე საკითხთან დაკავშირებით ანტიკორუფციულმა ბიურომ „სტუდია მონიტორს“ ასე უპასუხა:
„ამ ეტაპზე იმყოფება იმ პოზიციაზე, რომლის საჯაროობაც შეზღუდულია. შესაბამისად, ამიტომ არ დევს საიტზე მისი დეკლარაცია“.
საქმე ისაა, რომ „კორუფციის წინააღმდეგ ბრძოლის შესახებ კანონით საჯარო არ არის თანამდებობის პირის დეკლარაცია, რომლის თანამდებობას „სახელმწიფო საიდუმლოების შესახებ“ საიდუმლოების გრიფი აქვს მინიჭებული“.
პოლიციელი ირაკლი დგებუაძე მზია ამაღლობელის საქმის მთავარი ფიგურანტია. ის მზია ამაღლობელის საქმეში დაზარალებულად ცნეს – ბათუმის პოლიციის იმდროინდელი უფროსის ჩვენების მიხედვით, სილის გაწვნის შედეგად მან ტკივილი განიცადა და ლოყა გაუწითლდა.
„ბათუმელების“ მიერ გადაღებულ ვიდეოკადრებში ჩანს, რომ მზია ამაღლობელს დაკავების დროს ირაკლი დგებუაძე აგინებს და ემუქრება.
მზია ამაღლობელის თქმით, დაკავების შემდეგ პოლიციის დეპარტამენტის შენობაში ირაკლი დგებუაძემ მას სახეში შეაფურთხა, ასევე, არ აძლევდა წყლის დალევის და ტუალეტით სარგებლობის საშუალებას. პოლიციის უფროსის მხრიდან არაადამიანური მოპყრობის შემთხვევა პროკურატურამ არ გამოიძია.
- ამავე თემაზე: „ავხედე. მივხვდი, რომ უნდა დამარტყას. გაჩერდა და სახეში შემაფურთხა“ – მზია ამაღლობელი დგებუაძეზე
პროევროპულ აქციებზე დაკავებული არაერთი სხვა პირი ადანაშაულებდა ირაკლი დგებუაძეს ფიზიკურ ძალადობასა და არაადამიანურ მოპყრობაში. არც ერთი ეს შემთხვევა პროკურატურას არ გამოუძიებია.
2026 წლის 12 იანვარს წელი შესრულდა, რაც „ბათუმელებისა“ და „ნეტგაზეთის“ დამფუძნებელი და მედიამენეჯერი მზია ამაღლობელი უკანონო პატიმრობაშია.
დაკავების დღიდან, პროტესტის ნიშნად, მზია ამაღლობელი 38 დღის განმავლობაში შიმშილობდა. მას პატიმრობაში მკვეთრად დაუქვეითდა მხედველობა.
მზია ამაღლობელი წინასწარ პატიმრობაში დატოვეს, იგი ბათუმში გაასამართლეს სისხლის სამართლის წესით და 2-წლიანი პატიმრობა მიუსაჯეს.
მზია ამაღლობელის სასამართლო პროცესები მიმდინარეობდა მის წინააღმდეგ მიმართული „ოცნების“ ლიდერების მიერ გავრცელებული დეზინფორმაციის ფონზე, ცრუ მოწმე პოლიციელების მონაწილეობით, პროპაგანდა მაქსიმალურად ცდილობდა მის დისკრედიტაციას და რეპუტაციის შელახვას.
მზია ამაღლობელის საქმე ერთ-ერთია სინდისის პატიმრების საქმეებს შორის. მისი გათავისუფლება მოითხოვა არაერთმა საერთაშორისო ორგანიზაციამ, ასევე: გერმანიის საგარეო საქმეთა სამინისტრომ; ევროპარლამენტის ვიცეპრეზიდენტმა პინა პიჩერნომ, ამერიკელმა კონგრესმენმა ჯო უილსონმა, ევროპარლამენტმა და ა.შ.
2025 წლის 22 ოქტომბერს, პატიმრობაში მყოფმა მზია ამაღლობელმა მიიღო სახაროვის პრემია აზრის თავისუფლებისთვის, ევროკავშირის ადამიანის უფლებათა უმაღლესი ჯილდო და არაერთი პრიზი ჟურნალისტური საქმიანობისთვის.
მზია ამაღლობელის ადმინისტრაციული დაკავების საქმის განხილვა უკვე დაიწყო სტრასბურგის ევროპულმა სასამართლომ, მისი სისხლის სამართლის საქმე კი საქართველოს უზენაეს სასამართლოში უნდა განიხილონ.
