ავტობანის ხაჯალია-სუფსის და სამტრედია-ჯაპანის მონაკვეთების დასრულება წელს იგეგმება

საქართველოს საავტომობილო გზების დეპარტამენტის ინფორმაციით, სამტრედია-გრიგოლეთის მშენებარე ახალი ავტომაგისტრალის ორი მონაკვეთის დასრულება 2022 წელს იგეგმება.

ეს მონაკვეთებია: სამტრედია-ჯაპანა [ლოტი 1] და ხაჯალია-სუფსა[ლოტი 4].

დეპარტამენტის ინფორმაციით, ამ ეტაპზე ხაჯალია-სუფსის მონაკვეთზე „გამყოფი ზოლის ბეტონის პარაპეტებით შემოფარგვლისა და მიწის ვაკისის ფერდებზე მცენარეული ფენის მოწყობის სამუშაოები მიმდინარეობს“.

სამტრედია-გრიგოლეთის გზის მშენებლობა ოთხ მონაკვეთად [ლოტად] დაიწყო და ის სულ ცოტა 2020 წელს მთლიანად უნდა დასრულებულიყო, თუმცა, ამ დროისთვის მხოლოდ ერთი, ჯაპანა-ლანჩხუთის [ლოტი 2] მონაკვეთია დასრულებული.

რაც შეეხება ლანჩხუთი-ხაჯალიას [ლოტი 3] მონაკვეთს, საავტომობილო გზების დეპარტამენტის ინფორმაციით, მიმდინარეობს სატენდერო პროცედურები.

ლანჩხუთი-ხაჯალიას მონაკვეთს „ტოდინი“ აშენებდა, თუმცა, დეპარტამენტმა ხელშეკრულება ამ კომპანიასთან შეწყვიტა.

ხელშეკრულების შეწყვეტამდე, „ტოდინი“ ხულო-ზარზმის გზის მშენებლობაზე გამოცხადებულ ტენდერში გამოავლინა დეპარტამენტმა გამარჯვებულად და ხელშეკრულებაც გააფორმა, თუმცა, მოგვიანებით, ეს ხელშეკრულებაც შეწყვიტა.

სამტრედია-გრიგოლეთის გზაზე ასფალტ-ბეტონის საფარი მოეწყობა. გზა 52 კილომეტრი იქნება. ის ზესტაფონი-ქუთაისის შემოვლითი-სამტრედიის გზის 42-ე კმ-ზე, მდინარე ოჩოფასთან დაიწყება და გრიგოლეთის ტერიტორიაზე, მდინარე სუფსასთან დამთავრდება.

აქედან ახალი გზა გაგრძელდება და ის ქობულეთის შემოვლით გზას შეუერთდება. ამ მონაკვეთის [გრიგოლეთი-ჩოლოქის] მშენებლობაც 2020 წელს უნდა დასრულებულიყო, თუმცა, მშენებლობა დღესაც გრძელდება.

ქობულეთის შემოვლითი გზა კი, მახინჯაურის გვირაბთან, ბათუმის შემოვლით გზას უნდა შეუერთდეს. დროულად ვერც ბათუმის შემოვლითი გზა აშენდა:

როდის დასრულდება ბათუმის შემოვლითი გზის მშენებლობა – ახალი ვადა

ბათუმის შემოვლითი გზა მდინარე ჭოროხიდან სარფამდე უნდა გაგრძელდეს. ამ შემთხვევაში ჯერ არც ის არის ცნობილი, თუ როდის დასრულდება ახალი ჩქაროსნული ავტომაგისტრალის დაპროექტება ამ მონაკვეთზე.