მთავარი,სიახლეები

2 წელი მარიუპოლის თეატრის დაბომბვიდან – ვიდეო

16.03.2024 • 3754
2 წელი მარიუპოლის თეატრის დაბომბვიდან – ვიდეო

დღეს, 16 მარტს, ბათუმში მცხოვრებმა უკრაინელებმა, ორგანიზაცია „მეიდან ბათუმის“ წევრებმა ბათუმში აქცია გამართეს.

დღეს ორი წელი გავიდა მას შემდეგ, რაც რუსეთმა მარიუპოლში დაბომბა თეატრის შენობა, რომელსაც მშვიდობიანი მოქალაქეები, მათ შორის ბავშვები აფარებდნენ თავს.

აქციის მონაწილეებმა ევროპის მოედანზე ფოტოგამოფენით აღნიშნეს 2 წლისთავი მასშტაბური ტერორისტული აქტიდან, რომელიც რუსეთმა უკრაინელების წინააღმდეგ ჩაიდინა.

„დღეს მეორე წლისთავია მარიუპოლის ტერორისტული აქტიდან. ორი წლის წინ რუსმა ჯარისკაცებმა ჩამოაგდეს მძიმე საავიაციო ბომბი მარიუპოლის გულში, მარიუპოლის დრამატულ თეატრში, სადაც იყვნენ მოქალაქეები ბავშვებთან ერთად.

თეატრის შენობის წინ დაწერეს დიდი ასოებით – ბავშვები. ჩვენ ვფიქრობთ, რომ მთელმა მსოფლიომ აუცილებლად უნდა გაიცნოს ჩვენი ჩრდილოელი მეზობლის ნამდვილი სახე,“ – უთხრა „ბათუმელებს“ აქციის ერთ-ერთმა მონაწილემ ალექსი სევერინენკომ.

თანამგზავრიდან გადაღებული ფოტოების მიხედვით, მარიუპოლში, თეატრის ორივე მხარეს ასფალტზე დიდი ასოებით ეწერა – ბავშვები.

მარიუპოლი რუსმა ჯარისკაცებმა 2022 წლის მაისში აიღეს, სამთვიანი სასტიკი ბრძოლების შემდეგ. ქალაქის 90 % ბრძოლებისას განადგურდა.

დღემდე უცნობია ზუსტი რიცხვი, რამდენი მშვიდობიანი მოქალაქე ემსხვერპლა რუსეთის თავდასხმას.

ფოტოგამოფენა ევროპის მოედანზე

გადაბეჭდვის წესი


ასევე: