„პოლიციელი რას დაგიცავს, პირიქით, პოლიციელებს რომ ვხედავ, ვფიქრობ, სად გავიქცე, თავი როგორ ავარიდო-მეთქი… საშიშროებაა პოლიციელი, აბა რაა,“ – გვითხრა მოქალაქე ნონა ხორავამ აჭარის მთავრობის სახლის წინ დღეს, 22 აპრილს, უსახლკაროების მიერ გამართულ აქციაზე.
ნონა ხორავა ერთ-ერთია მათ შორის, ვინც დღეს აჭარის არალეგიტიმური მთავრობის თავმჯდომარეს – სულხან თამაზაშვილს მიაკითხა. მოქალაქეები, რომლებიც ამბობენ, რომ უსახლკაროები არიან, ბათუმში წლებია მთავრობის ყურადღებას ითხოვენ, თუმცა ამ დრომდე აჭარის მთავრობას ან ბათუმის მერიას უსახლკაროებისთვის ცალკე პროგრამა არ შეუქმნია.
ამ ადამიანებს შორის არიან მარტოხელა დედები, შშმ პირები, სოციალურ შემწეობაზე დამოკიდებული პირები… წლებია ამ ოჯახების საჭიროებებიც კი, აჭარის მთავრობას არ შეუსწავლია.
„გამოვიდა მთავრობის აპარატის წარმომადგენელი და გვითხრა, ჩამოგვიწერეთ თქვენი სახელი და გვარებიო. მერამდენედ ვწერთ ამას, მაგრამ კიდევ დავწერთ, რა პრობლემაა,“ – გვითხრეს ნახევრად ხუმრობით აჭარის მთავრობის ადმინისტრაციული შენობის წინ შეკრებილმა მოქალაქეებმა. მერე აქციის ერთ-ერთი მონაწილე ხეს მიეყრდნო და სახელდახელოდ უსახლკაროების სიის შედგენა დაიწყო.
აქცია აჭარის მთავრობის სახლთან
ნონა ხორავაც სოციალურად დაუცველია ქალია. იგი ამბობს, რომ ქირის გადახდას ვეღარ ახერხებს და ნათესავებთან ცხოვრობს:
„2011 წლიდან ვართ ნაქირავებში. ჩემი ქმარი შუახევიდანაა, გასარიგი ვიყავით, მაგრამ სიდუხჭირეში ვცხოვრობდით… წალკაში გადაყვანას დაგვპირდნენ, მაგრამ მოგვატყუეს – მთავრობას ტყუილი სჩვევია ყოველთვის.
ჩემი რძალი დევნილია აფხაზეთიდან, იმას მოუწია ბინა ბათუმში, დევნილების დასახლებაში, დედისერთაა და მშობლებიც მასთან ცხოვრობენ… რამდენი ვიცხოვრებთ 54 კვადრატულში? ჩემი შვილი შემდუღებლად მუშაობს, ის გვიმატებდა თანხას ქირაზე.
ახლა პოლიციელი დანიშნესო მთავრობის თავმჯდომარედ. რა მოლოდინი უნდა მქონდეს? ვინც იყო, ის დარჩენილიყო სჯობდა, მაძღარი მაინც იყო. მგონი, პენსიამდეც ვერ მივაღწევ. უფასო სასადილო რომ არ იყოს, მშიერი დავწყდებოდით. ჯანმრთელობის მძიმე პრობლემები მაქვს.
აქციებზე მინდა გამოსვლა, აქ რაც იმართება, საკონსტიტუციოსთან, მაგრამ რამე შეხლა-შემოხლა რომ მოხდეს და გასარბენი იყოს, ვერ გავირბენ. ვუერთდები პროტესტს. რომ შემეძლოს, ყოველდღე აქ ვიქნებოდი,“ – გვითხრა ნონა ხორავამ.
„ხან ერთ ძმისშვილთან ვათევ ღამეს, ხან – მეორესთან, ქმარი არ მყავს და შვილი, სად გავიქცე? ჩემი პენსია 450 ლარია, წამლებში არ მყოფნის, შაქარი მაწუხებს. 73 წლის ვარ და 3 წელია აქციიდან აქციაზე დავდივარ,“ – ამბობს გუგული წითელაძე. მან იუსტიციის სახლში აღებული დოკუმენტიც გვაჩვენა, რომელიც მისთვის ბათუმის მერიაში მოუთხოვიათ და რომლის მიხედვითაც პენსიონერი საქართველოში არანაირი უძრავი ქონების მესაკუთრე არ არის.
„ასე გვთხოვენ დოკუმენტებს, მაგრამ მერე არაფერი იცვლება,“ – დასძინა გუგული წითელაძემ.
უსახლკაროების მიმართ ერთიანი პოლიტიკა „ქართულ ოცნებას“ არ აქვს. ბათუმში არსებობს „ოცნების ქალაქი“, სადაც თვითნებურად დასახლებულ ასობით ადამიანს წლების გასვლის შემდეგ „ოცნების“ მთავრობამ ბიუჯეტის ხარჯზე ბინები აუშენა და ეს მას შემდეგ მოხდა, როცა წინასაარჩევნოდ „ქართულმა ოცნებამ“ ამ დასახლების სქემაც აამუშავა.
სხვა უსახლკაროების პრობლემებთან მიმართებით კი ამ დრომდე „ოცნების“ დამოკიდებულება ასეთია: მთავრობა უსახლკაროების პრობლემებს არ აგვარებს და არც მიტოვებულ სახელმწიფო შენობებში თვითნებურად შეჭრილ უსახლკაროებს ასახლებს. მაგალითად, უსახლკარო ოჯახების ნაწილი ამ დრომდე რჩება ბათუმში აგრარული ბაზრის, ასევე თევზის ბაზრის მიმდებარედ არსებულ სახელმწიფოს კუთვნილ შენობებში.
დღეს აქციაზე გამოსული მოქალაქეები ბუკნარში, ასევე სახელმწიფოს კუთვნილ შენობაში 2024 წელს შეიჭრნენ, თუმცა იქ ცხოვრებისთვის გაუსაძლისი პირობებია და უსახლკაროებმაც შენობა რამდენიმე დღეში დატოვეს.
„ეს აწყობს ხელისუფლებას, რომ ერთად არ მოიყაროს თავი ამდენმა უსახლკარომ,“ – გვითხრა საპროტესტო აქციის ერთ-ერთმა ორგანიზატორმა, დავით აზნაურიშვილმა, – „სახელმწიფოს კუთვნილ შენობაში თვითნებურად შესულ ოჯახებს შუქიც ჩაურთეს… ეს ხალხი რომ გამოასახლონ ამ შენობებიდან, ერთად 10 ათასი კაცი მიადგება მთავრობას.
მთავრობას ყოველთვის შეუძლია ეს ხალხი სათავისოდ გამოიყენოს. ხვალ მიადგება, როცა საჭიროდ ჩათვლის და ეტყვის, თუ ხმას ამოიღებთ, აქედან გაგყრითო. ეს ხალხი ერთად უნდა დადგეს და ეს იქნება გამოსავალი.
ამ ადამიანებს დღეს „ოცნება“ დაპირებას ფურცელზეც არ აძლევს, მხოლოდ ზეპირად ჰპირდებიან ხან რას, ხან – რას, მერე იძახის მთავრობა, რომ ეკონომიკა ყვავის და ყველა ბედნიერიაო. სინამდვილეში, მთავრობაც უბედურია, თუ დააკვირდებით და ხალხიც უბედურია. ყველა უბედურია დღეს, რადგან ჩვენ ვერ შევდექით, როგორც ერი,“ – გვითხრა დავით აზნაურიშვილმა.
მოქალაქეებს, რომლებიც აცხადებენ, რომ უსახლკაროები არიან, აჭარის არალეგიტიმური მთავრობის თავმჯდომარე არ შეხვედრია.
ამ თემაზე:
უსახლკარო, რომელიც მთავრობასთან მუყაოს ყუთში ჩაჯდა: „ოცნება“ 12 წელია გვატყუებს, აღარ მოვტყუვდებით
