ბათუმელ მედროშეს, თემურ ქათამაძეს (გაფფარ ილმაზი) საემიგრაციო პატიმრობის ვადა 6 თვემდე გაუხანგრძლივეს.
თემურ ქათამაძე ბათუმში, საპროტესტო აქციაზე 11 იანვარს დააკავეს და ის დღემდე შსს-ს მიგრაციის დროებითი განთავსების ცენტრში იმყოფება პატიმრობაში. თუმცა სამთვიანი ვადის გასვლის შემდეგ ქათამაძე კიდევ დარჩება პატიმრობაში.
„შინაგან საქმეთა სამინისტროს მიგრაციის დეპარტამენტის დროებითი განთავსების ცენტრში მოთავსების ვადა გახანგრძლივდეს დამატებით, დაკავების საფუძვლის აღმოფხვრამდე, ან მისთვის საქართველოდან გაძევების შესახებ გადაწყვეტილების აღსრულებამდე 6 თვემდე ვადით“- წერია ოქმში.
„მიგრაციის დეპარტამენტმა იშუამდგომლა კანონით გათვალისწინებული საფუძვლით. ამბობდნენ, რომ არსებობდა მიმალვის საფრთხე და საქმის გაჭიანურების ან მიმალვის მიზნით მიმართა საერთაშორისო დაცვის მოთხოვნითო და ამის საფუძველზე მოითხოვეს დაკავების ვადის გაგრძელება და სასამართლომ დაუკმაყოფილა.
ეს არის დროებითი განთავსების ცენტრში მოთავსების ვადის გაგრძელების შუამდგომლობა“, – ამბობს საიას ადვოკატი ვერიკო ჯგერენაია, რომელიც თემურ ქათამაძის ინტერესებს იცავს.
თემურ ქათამაძემ პატიმრობაში ყოფნის დროს მიმართა სახელმწიფოს და მოითხოვა ჰუმანიტარული და ლტოლვილის სტატუსი, რაზეც უარი მიიღო. მას ეს საკითხი გასაჩივრებული აქვს.
თემურ ქათამაძემ პატიმრობაში 40 დღე იშიმშილა კიდეც, პროტესტის ნიშნად.
შს სამინისტროს დავა აქვს წამოწყებული თემურ ქათამაძის გაძევებასთან დაკავშირებით, თუმცა ამ საკითხზე ჯერ საბოლოო გადაწყვეტილება მიღებული არ არის.
