მუჰაჯირების შთამომავალი თემურ ქათამაძე, რომელიც რამდენიმე წელია საქართველოში ცხოვრობს და ბოლო დროს განვითარებული მოვლენებიდან გამომდინარე, აქტიურად მონაწილეობს საპროტესტო აქციებში, სამტრედიის რაიონულმა სასამართლომ 3-თვიან პატიმრობაში დატოვა.
„დღეს, 18 იანვარს, განიხილებოდა საკითხი გაძევების შესახებ საბოლოო გადაწყვეტილების მიღებამდე, ყოფილიყო თუ არა ბატონი თემური დაკავებული.
შემჭიდროვებული ვადები ჰქონდა სასამართლოს ამ ტიპის საქმეების განსახილველად და სამტრედიის რაიონულმა სასამართლომ თემურ ქათამაძე დატოვა დაკავებაში, რაც ნიშნავს იმას, რომ ქათამაძეს გადაიყვანენ უცხოელთა დაკავების განთავსების ცენტრში, რომელიც თბილისშია.
სამ თვემდე გასცა სასამართლომ დაკავების ბრძანება, რაც იმას ნიშნავს, რომ სანამ არ მიიღება გადაწყვეტილება თემურ ქათამაძის გაძევების თაობაზე, ის იქნება 3-თვიან პატიმრობაში, რაც შემდგომში ცალკე განხილვის საგანია და ამაზე ცალკე დაიცავს საია თემურ ქათამაძის ინტერესებს“ – ამბობს ადვოკატი დარეჯან სალდაძე.
ადვოკატის თქმით, სამტრედიის რაიონული სასამართლოს მიერ მიღებული გადაწყვეტილება გასაჩივრდება 5 დღის ვადაში, ქუთაისის სააპელაციო სასამართლოში.
„ცხადია გავასაჩივრებთ ამ გადაწყვეტილებას და ყველა სამართლებრივ მექანიზმს გამოვიყენებთ“- ამბობს ადვოკატი.
თემურ ქათამაძე უკვე წლებია ითხოვს საქართველოს მოქალაქეობის მინიჭებას, თუმცა მას, როგორც ქათამაძე ამბობდა, გარკვეული ბიუროკრატიული ბარიერები ექმნებოდა.
დარეჯან სალდაძის თქმით, მოქალაქეობის მინიჭებასთან დაკავშირებულ საკითხს თბილისის საქალაქო სასამართლო განიხილავს. დღეს კი, როგორც ადვოკატი ამბობს, გაძევებასთან დაკავშირებით დაკავების კანონიერების საკითხზე იმსჯელა სამტრედიის სასამართლომ.
თემურ ქათამაძე ორჯერ დააკავა პოლიციამ. პირველად ბათუმში, შემდეგ კი 16 იანვარს, ადმინისტრაციული პატიმრობიდან გათავისუფლების შემდეგ, რამდენიმე წუთში ხელმეორედ დააკავეს.
გუშინ, 17 იანვარს თემურ ქათამაძემ პროტესტის ნიშნად შიმშილობა დაიწყო.
_____________
ფოტოზე: თემურ ქათამაძე. ფოტო: „ბათუმელები“
