„ძლიერი საქართველო – ლელო ხალხისთვის, თავისუფლებისთვის“ აჭარის უმაღლეს საბჭოში საარჩევნო სიას ხსნის.
კოალიციის წევრებმა დღეს, 26 ნოემბერს, ბრიფინგი გამართეს, სადაც სიების ჩახსნის შესახებ ოფიციალური განცხადება გააკეთეს.
„კოალიციამ მიიღო გადაწყვეტილება სიების ჩახსნათან დაკავშირებით. ეს ეხება არამარტო საქართველოს პარლამენტს, ასევე ეხება აჭარის უმაღლეს საბჭოსაც. მას შემდეგ, რაც „ქართულმა ოცნებამ“ არჩევნები გააყალბა, ჩვენი კოალიცია ერთ-ერთი პირველი იყო, რომელმაც თქვა, რომ ამ თამაშში და დიდ ქურდობაში მონაწილეობას არ მიიღებდა. არ მივცემდით ლეგიტიმაციას „ქართულ ოცნებას“.
ჩვენ ვტოვებთ „ოცნებას“ მარტო თავის ნაქურდალ მანდატებთან ერთად,“ – თქვა გენო თებიძემ, კოალიციის წევრმა.
გენო თებიძე კოალიციის საარჩევნო სიის პირველი ნომერი იყო და აჭარის უმაღლეს საბჭოში მოხვდა, თუმცა მანდატზე უარი თქვა. დღეს, როცა ახლადარჩეული აჭარის უმაღლესი საბჭოს პირველი სხდომა კონსტიტუციის დარღვევით იმართებოდა, გენო თებიძე უმაღლესი საბჭოს შენობის გარეთ იდგა და ამ სხდომის გამართვას აპროტესტებდა.
აჭარის უმაღლესი საარჩევნო კომისიის შემაჯამებელი ოქმის მიხედვით, აჭარის უმაღლეს საბჭოში 21 სადეპუტატო მანდატიდან 13 მანდატი მიიღო „ქართულმა ოცნებამ“, ხოლო 8 მანდატი მიიღეს ოპოზიციურმა პარტიებმა. კერძოდ, „კოალიცია ცვლილებისთვის გვარამია მელია გირჩი დროა“ – 1 მანდატი; ერთიანობა-ნაციონალური მოძრაობა“ – 4 მანდატი; „ძლიერი საქართველო – ლელო ხალხისთვის, თავისუფლებისთვის“ – 1 მანდატი; „გახარია საქართველოსთვის“ – 2 მანდატი.
ოპოზიციური პარტიები არ სცნობენ 26 ოქტომბრის არჩევნების შედეგებს, თვლიან, რომ ხმები მოპარულია, არჩევნები გაყალბებულია, ამიტომ არ აპირებენ მანდატების მიღებას.
2024 წლის 26 ოქტომბრის საპარლამენტო და აჭარის უმაღლესი საბჭოს არჩევნების შედეგები საქართველოს პრეზიდენტს გასაჩივრებული აქვს საქართველოს საკონსტიტუციო სასამართლოში.
კონსტიტუციონალისტების განმარტებით, საკონსტიტუციო დავის დასრულებამდე პარლამენტის და აჭარის უმაღლესი საბჭოს უფლებამოსილების ცნობა უკანონოა.
ამავე თემაზე:
