საქართველოს მთავრობამ კერძო კომპანია New Road ხულოში, მწვანე ტბის მიმდებარე ადგილებში სასარგებლო წიაღისეულის მოპოვების ლიცენზიისგან გაათავისუფლა.
მთავრობის 2024 წლის 2 სექტემბრის განკარგულებით New Road-ს უფლება აქვს 2024 წლის 9 დეკემბრამდე რიყეთის ადმინისტრაციულ ერთეულში ჯამში 198 701 კუბური მეტრი წიაღისეული- ანდეზიტის ლოდნარი მოიპოვოს.
წიაღისეულის/ინერტული მასალის მოპოვება კომპანიას 3 ადგილზე შეუძლია და ლიცენზიისგან გათავისუფლების სანაცვლოდ ბიუჯეტში 596 ათას 103 ლარი უნდა გადაიხადოს [ანუ, 1 კუბურ მეტრ წიაღისეულში – 3 ლარი].
New Road ხულო-გოდერძის გზის მშენებლობაზე მუშაობს. ულიცენზიოდ მოპოვებული ინერტული მასალაც ამ გზის მშენებლობას უნდა მოხმარდეს.
კომპანიის მიერ მწვანე ტბის მიმდებარედ წიაღისეულის მოპოვებაზე „ბათუმელები“ მიმდინარე წლის ივლისშიც წერდა, თუმცა შესაბამისმა სახელმწიფო უწყებებმა არ გვიპასუხეს, ჰქონდა თუ არა კომპანიას შესაბამისი ლიცენზია და ვის მიერ იყო ის გაცემული.
ხულოში, მწვანე ტბასთან ინერტულ მასალებს მოიპოვებენ – მთავრობაში არ ამბობენ, ვინ გასცა ლიცენზია
მას შემდეგ, რაც ინერტული მასალის უკანონოდ მოპოვების შესახებ ინფორმაცია მედიაში გაჟღერდა, ინერტული მასალის მოპოვების სამუშაოები თითქოს შეჩერდა, თუმცა, გეოლოგის შეფასებით „ზიანი უკვე გამოუსწორებელია, რაც გააქტიურებს მეწყრულ პროცესებს“. გეოლოგის აზრით, ამ ადგილებში ინერტული მასალის მოპოვებაზე ლიცენზია არც შეიძლება გაცემულიყო.
მწვანე ტბასთან ინერტულ მასალას აქამდეც მოიპოვებდნენ. ფოტო: „ხულო და მისი პერსპექტივები“
აჭარის უმაღლესი საბჭოს წევრმა კი პროკურატურასაც მიმართა დაიწყოს გამოძიება მწვანე ტბაზე მიმდინარე სამუშაოების შესწავლის მიზნით.
თუმცა, მთავრობის 2024 წლის განკარგულებიდან ჩანს, რომ ინერტული მასალების მოპოვება მინიმუმ დეკემბრამდე გაგრძელდება. New Road-მა კი, სასარგებლო წიაღისეულის ულიცენზიოდ მოპოვების ვადის გასვლიდან ორი კვირის ვადაში უნდა წარუდგინოს მინერალური რესურსების ეროვნულ სააგენტოს თუ რა ოდენობის ბუნებრივი რესურსი მოიპოვა.
ამავე თემაზე:
ეს გამოუსწორებელი ზიანია და გაააქტიურებს მეწყერს – ექსპერტი მწვანე ტბასთან მთების დაშლაზე
