ბათუმი,მთავარი,სიახლეები

ბათუმის პლაჟი ხელოვნურ კვებაზეა – ბიუჯეტიდან ყოველწლიურად 2,3 მილიონი დაიხარჯება

05.12.2023 • 1162
ბათუმის პლაჟი ხელოვნურ კვებაზეა – ბიუჯეტიდან ყოველწლიურად 2,3 მილიონი დაიხარჯება

აჭარის 2024 წლის ბიუჯეტის პროექტში დაფინანსებულია პროგრამა, რომელიც პლაჟის ხელოვნური კვების სამუშაოებს ითვალისწინებს. ამ პროგრამის ფარგლებში მდინარის კალაპოტიდან ზღვის სანაპიროზე ინერტული მასალა უნდა შეიტანონ. ეს აუცილებელია ბათუმში პლაჟის შესანარჩუნებლად.

დღეს არსებული ბიუჯეტის პროექტის მიხედვით, პროგრამა 2024-2027 წლებს მოიცავს და ყოველწლიურად პლაჟის ხელოვნური კვებისთვის 2 მილიონ 300 ათასი ლარია გაწერილი, ჯამში – 9,2 მილიონი ლარი.

აჭარის 2024 წლის ბიუჯეტის პროექტიდან

პროგრამა აჭარის გარემოს დაცვისა და ბუნებრივი რესურსების სამმართველომ უნდა განახორციელოს.

რამდენად იქნება საკმარისი ერთ წელში 2,3 მილიონი ლარი და რა რაოდენობის ნატანის შეტანა მოხერხდება ამ თანხის ფარგლებში, ჯერ უცნობია. მითუმეტეს, ამ თანხით უნდა დაფინანსდეს საპროექტო-სახარჯთაღრიცხვო დოკუმენტაციის მომზადება, უშუალოდ პლაჟის ხელოვნური კვების სამუშაოები და ამ სამუშაოებზე ტექნიკური ზედამხედველობაც.

ნიშანდობლივია, რომ 2022 წლის ნოემბრიდან 2023 წლის მაისამდე სანაპიროზე 413 ათასი კუბური მეტრი ინერტული მასალა შეიტანეს.

ბიუჯეტის პროექტის მიხედვით ამ სამუშაოებში 2022 წელს 674 ათასი, ხოლო 2023 წელს 4 901 800 [ანუ, სულ 5 575 800] ლარი დაიხარჯა.

ამ რაოდენობის ხრეშის შეტანის მიუხედავად ზღვამ სანაპირო ზოლი 27 ნოემბერს შტორმის დროს მაინც დაანგრია.

შტორმი ბათუმში / 27.11.2023

პროექტის მიხედვით, ნატანს/ხრეშს პროგრამის ფარგლებში ბათუმის გამწმენდი ნაგებობის მოპირდაპირედ, ასევე, აეროპორტის ასაფრენი ბილიკის და ე.წ. ახალი ბულვარის მიმდებარე მონაკვეთზე შეიტანენ. სანაპიროზე ხელოვნურად შეტანილ ხრეშს კი შემდეგ ზღვა თავად გადაანაწილებს.

ბიუჯეტის პროექტში აღნიშნულია, რომ პროგრამა – „პლაჟის ხელოვნური კვების სამუშაოები“ – „ითვალისწინებს მდინარე ჭოროხის კალაპოტში არსებული კარიერებიდან პლაჟწარმომქმნელი ნატანის ტრანსპორტირებას და შავი ზღვის სანაპირო ზოლზე შესაბამის უბნებში რეცხვადი ბერმის მოწყობას.“

თუმცა გეოლოგი ტარიელ ტუსკია ამბობს, რომ საქართველოს იმ მდინარეებში, რომლებიც შავ ზღვაში ჩაედინება, პლაჟწარმომქმნელი ნატანის მოპოვება უკვე პრობლემაა. ზღვის პლაჟის აღდგენას კი აუცილებლად მდინარეული ინერტული მასალა სჭირდება.

მისივე თქმით, „კახეთსა და სხვა რეგიონებში არსებობს ინერტული მასალის რესურსი, ბევრი მშრალი მდინარეა, თუმცა ტრანსპორტირებაა რთული. შესაძლებელია, მატარებლის ვაგონებით ამ ინერტული მასალის ჩამოტანა.“

შტორმი ბათუმში / 27.11.2023

ზღვის სანაპირო ზოლში ინერტული მასალის აღმოსავლეთ საქართველოდან შემოტანა თუ გახდა საჭირო, ბუნებრივია, ამას გაცილებით დიდი ფინანსები დასჭირდება.

დღეს კვლავ აქტუალურია საკითხი, რომ „ახლო მომავალში აუცილებლად უნდა შემუშავდეს [ბათუმის] სანაპიროს ექსპლუატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“.

სანაპიროზე ხრეშის შეტანა არა მარტო პლაჟის შენარჩუნებას ემსახურება, არამედ სანაპირო ზოლში ზღვისგან ხმელეთის მიტაცების პრევენციისთვის და იმ კონსტრუქციების დასაცავადაა აუცილებელი, რომლებიც ნაპირის გასამაგრებლად აშენდა ან ახლა შენდება.

ამავე თემაზე:

დაუცველი სანაპირო ბათუმში და დამცავი კედელი, რომელსაც ზღვა შლის | ფოტო

გადაბეჭდვის წესი


ასევე: