რას უპირებენ ახალ ბულვართან შტორმით დანგრეულ პირსს

ბათუმში, ახალ ბულვართან მდებარე პირსი ზღვამ 2021 წლის დეკემბერში დაანგრია. პირსის დანგრევიდან ორი წლის შემდეგ კვლავ გაურკვეველია ვინ აღადგენს მას, ან აღადგენენ თუ არა საერთოდ.

„ბათუმელებს“ აჭარის ფინანსთა და ეკონომიკის სამინისტროდან ორი წლის წინ მოგვწერეს, რომ „შესაბამისი სპეციალისტები შეისწავლიან და ბულვარის განაშენიანების რეგულირების გეგმის ფარგლებში მოხდება აღნიშნული პირსის რეკონსტრუქციასთან დაკავშირებით გადაწყვეტილების მიღება“.

შტორმის დროს დანგრეული პირსი / 23.02.2024

აჭარის ფინანსთა და ეკონომიკის სამინისტროს „ბათუმელები“ კვლავ დაუკავშირდა, თუმცა სამინისტროს პრესსამსახურმა ამჯერად ბულვარის ადმინისტრაციაში გადაგვამისამართა.

„პირსი არ არის ჩვენს ბალანსზე და მის შესწავლა-აღდგენაზე არ ვმუშაობთ“ – გვითხრეს ბათუმის ბულვარის პრესსამსახურში 2024 წლის 23 თებერვალს.

პირსთან დაკავშირებით ბათუმის მერიამ კი საქალაქო ინფრასტრუქტურისა და კეთილმოწყობის სამმართველოში გადაგვამისამართა, სადაც იგივე გვითხრეს – „ჩვენ არ ვმუშაობთ“.