„მაღალმთიანი აჭარის ხმა მედიაში“ – ამ თემაზე გაიმართება შეხვედრა თანამედროვე ხელოვნების სივრცეში, 12 ნოემბერს, კვირას, 17:00 საათზე.
შეხვედრამდე 1 საათით ადრე, 16:00 საათზე კი ამავე სივრცეში გაიხსნება ფოტოგამოფენა, რომელიც მაღალმთიან აჭარაში მცხოვრები ადამიანების ყოველდღიურობას ასახავს.
შეხვედრის პირველ ნაწილში “ბათუმელების” ჟურნალისტი ევა [ნინო] ართმელაძე ისაუბრებს თავის გამოცდილებაზე, რაც მაღალმთიანი აჭარის სოფლებსა და იალაღებზე მცხოვრები ადამიანების, მათი გარემოს შესახებ მომზადებულ მასალებზე მუშაობისას დააგროვა. განიხილავს სირთულეებს, რაც სამუშაო პროცესს ახლავს თან და მსმენელს მისი რამდენიმე რესპონდენტის შესახებ მოუთხრობს.
შეხვედრის მეორე ნაწილში სტუმრებს შესაძლებლობა ექნებათ, მოუსმინონ მემთეურ ქალებს, მათ სტუდენტ შვილებს, აჭარის მთიანეთში მცხოვრებ სხვა ადამიანებს და გაიზიარონ უშუალოდ მათი დამოკიდებულებები თუ შეფასებები ამ თემის ირგვლივ.
შეხვედრის ბოლო ნაწილი დაეთმობა დისკუსიას – აჭარის მთაში მცხოვრები ადამიანის ყოველდღიურობისა და მათი საცხოვრებელი გარემოს რომანტიზება რას და რამდენად უქმნის საფრთხეს და რა როლი აქვს ამ დროს მედიას?
როგორ ცხოვრობენ აჭარის მთაში ადამიანები სინამდვილეში? როგორ აფასებენ თავად მათ შესახებ მომზადებულ ჟურნალისტურ მასალებს? ხომ არ აქვთ შენიშვნები ან რეკომენდაციები?
შეხვედრაზე ამ კითხვებზე პასუხების მოძებნას შეეეცდებიან და კიდევ ერთხელ გადაიაზრებენ ადამიანთა ყოფის რომანტიზების საფრთხეებს. ყურადღება გამახვილდება იმაზე, თუ რამდენად მნიშვნელოვანია, თანამედროვე ჟურნალისტიკა ზუსტად ასახავდეს ადამიანების ყოფას, არ იყოს ცალმხრივი და „თვალისმომჭრელმა ბუნებამ“ არ გადაფაროს იქ მყოფი ადამიანების შრომის ხარისხი, პრობლემები და სირთულეები.
შეხვედრაზე დასწრება თავისუფალია.
მისამართი: ზვიად განსახურდიას ქუჩა #1/5
