29 სექტემბერს ბათუმში მსოფლიო ტურიზმის დაჯილდოების ღონისძიება, World Travel Awards-ი გაიმართება.
აღნიშნული ჯილდო ბათუმმა პირველად 2019 წელს მიიღო. 2022 წელს კი, World Travel Awards-ის ევროპის ჯილდოს მოპოვების შემდეგ, ბათუმმა „ტურიზმის ოსკარი“ [როგორც მას უწოდებენ] მოიპოვა, როგორც მსოფლიოს სწრაფად მზარდმა ტურისტულმა მიმართულებამ.
დღეს, 28 სექტემბერს, World Travel Awards-ის ევროპის დაჯილდოების გალა ცერემონიამდე ერთი დღით ადრე ბათუმი ტურიზმის საერთაშორისო ფორუმს მასპინძლობს.
აჭარის ტურიზმისა და კურორტების დეპარტამენტის ცნობით, ღონისძიების ფარგლებში მსოფლიოს სხვადასხვა ქვეყნიდან ტურიზმის სფეროს ექსპერტები, ინდუსტრიის წამყვანი სპეციალისტები და სამთავრობო უწყებების წარმომადგენლები მდგრადი ტურიზმის განვითარებისა და ინოვაციური მარკეტინგული სტრატეგიების მიმართულებით საუბრობენ.
ღონისძიების დასრულების შემდეგ, ფორუმისა და World Travel Awards-ის ევროპის დაჯილდოების გალა ცერემონიის სტუმრებისთვის, დაგეგმილია ტურები რეგიონისა და ქვეყნის კულტურული მემკვიდრეობის, ტრადიციებისა და ქართული სტუმარ-მასპინძლობის გასაცნობად.
ხვალ, 29 სექტემბერს კი, ბათუმში გაირკვევა, რომელი ქვეყნები, ქალაქები და კომპანიები დასახელდება ევროპის წამყვან ტურისტულ მიმართულებებად, თუ კომპანიებად და რომელი მათგანი აიღებს World Travel Awards-ის პრესტიჟულ ჯილდოს.
World Travel Awards-ის ნომინაციებში წელს, ბათუმთან ერთად ბათუმის ბოტანიკური ბაღი და ბულვარიც იქნება წარდგენილი.
საქართველო World Travel Awards-ს პირველად მასპინძლობს. აჭარის ტურიზმისა და კურორტების დეპარტამენტის ცნობით, ღონისძიების ფარგლებში ბათუმს 24 ქვეყნის ტურიზმის ინდუსტრიის, მედიისა და ტურიზმის სამთავრობო უწყებების 300-მდე წარმომადგენელი ესტუმრება, მათ შორის პორტუგალიიდან, ხორვატიიდან, გერმანიიდან, დიდი ბრიტანეთიდან, აშშ-დან, ნორვეგიიდან, შვეიცარიიდან, გიბრალტარიდან და ნიდერლანდებიდან.
