ბერლინის გარეუბანში პოლიცია ისევ ეძებს მტაცებელ ცხოველს, სავარაუდოდ ლომს. სამუშაოებში ჩართულნი არიან სპეციალისტები, პოლიცია იყენებს ვერტმფრენებსა და დრონებს, თუმცა ცხოველის კვალს ჯერ ვერ მიაგნეს.
„დოიჩე ველეს“ ცნობით, სამძებრო სამუშაოებში დაახლოებით 220 პოლიციელია ჩართული.
მტაცებელ ცხოველს, სავარაუდოდ ლომს, 20 ივლისიდან ეძებენ ბერლინის გარეუბანში, მას შემდეგ, რაც 19 ივლისს, საღამოს, მოქალაქემ გაავრცელა ვიდეო, რომელზეც ჩანს დიდი ზომის მტაცებელი ცხოველი ბუჩქებში.
კადრი ვიდეოდან
პოლიცია ადგილობრივ მოსახლეობას ურჩევს, გამოიჩინონ სიფრთხილე და თავი შეიკავონ ბერლინის მიმდებარე ტყეებში გადაადგილებისგან. ბრანდენბურგის პოლიციამ მოუწოდა ნებისმიერს, ვინც მტაცებელს დაინახავს, სასწრაფოდ იპოვოს უსაფრთხო ადგილი და დაუკავშირდეს ხელისუფლებას.
ბერლინის გარეუბნის, კლაინმახნოვის მცხოვრებები გააფრთხილეს, არ დაეტოვებინათ სახლები და არ გაეშვათ გარეთ შინაური ცხოველები.
ჯერ კიდევ გაურკვეველია, როგორ გამოჩნდა ცხოველი ბერლინის გარეუბანში. პირველადი მოკვლევით დადგინდა, რომ არც ერთი ლომი არ დაკარგულა ზოოპარკებიდან.
„დოიჩე ველე“ წერს, რომ გარემოს დაცვის სააგენტოს ცნობით, ბრანდენბურგში 23 ლომია რეგისტრირებული სამ საცირკო კომპანიასა და ორ ზოოპარკში. ერთი ლომი კერძო პირს ჰყავს.
ბრანდენბურგში კანონი არ კრძალავს ლომის ყოლას, თუმცა ცხოველი რეგისტრირებული უნდა იყოს.
ხელისუფლების ცნობით, როგორც კი ცხოველს იპოვიან, მას ტრანკვილიზატორით დააძინებენ და ცხოველთა თავშესაფარში გადაიყვანენ.
