რატომ ვერ იხდიან პარკირების საფასურს ბათუმში და აჯარიმებენ თუ არა მძღოლებს

„ჩამოვედი მანქანით ბათუმში და მინდოდა გადამეხადა პარკირების საფასური 6 თვის. თუმცა, ბანკში გადახდა ვერ მოვახერხე. მითხრეს, რომ სისტემა, მათგან დამოუკიდებელი მიზეზის გამო არის გათიშული და არც ის იციან, როდის ჩაირთვება. საპატრულოშიც მივედი, მაგრამ ვერც იქ გავარკვიე ვერაფერი. არ მინდა დამაჯარიმონ“, – გვითხრა ერთ-ერთმა მძღოლმა.

ბათუმის მუნიციპალურ ინსპექციაში „ბათუმელებს“ უთხრეს, რომ მძღოლებს, რომლებიც ტექნიკური პრობლემის გამო პარკირების საფასურს ვერ იხდიან, არ დააჯარიმებენ.

„არ ვაჯარიმებთ ასევე იმ ავტომანქანის მფლობელებსაც, რომლებსაც პარკირების საფასური გადახდილი ჰქონდა და ვადა ამოეწურათ მას შემდეგ, რაც ეს ხარვეზი წარმოიქმნა. ზოგადად, პარკირების საფასურის გადახდის გარეშე დგომისთვის, ბათუმში ჯარიმა 10 ლარია“, – გვითხრეს ინსპექციაში.

ზოგიერთი მძღოლის თქმით კი, არ ახსოვთ, რომელ რიცხვამდე გადაიხადეს პარკირების საფასური, ვერც ვადის გადამოწმებას ახერხებენ და ვერც გადახდას.

„ბათუმელები“ დაუკავშირდა მერიის შპს „ბათუმის ავტოტრანსპორტს“, რომელიც პარკირების საფასურის გადახდაზე [სერვერის მუშაობაზეა] პასუხისმგებელი.

„ავტოტრანსპორტში“ 2023 წლის 7 აპრილს გვითხრეს, რომ პარკირების პროგრამულ სისტემაში იყო შეფერხება, რაც სერვერის დაზიანებას უკავშირდებოდა; ამასთან, ტექნიკური ხარვეზი იდენტიფიცირებული იყო და სისტემის გამართულად მუშაობისთვის 3 კვირა იყო საჭირო.

ეს 3 კვირა გავიდა.

რატომ ვერ ხერხდება პარკირების საფასურის გადახდა ბათუმში? რომელი რიცხვიდან წარმოიქმნა ეს პრობლემა და როდის აღმოიფხვრება? – ამ კითხვებზე პასუხებს „ავტოტრანსპორტიდან“ ველოდებოდით, თუმცა შემდეგ გვითხრეს, რომ ოფიციალურად, წერილობით მივმართოთ.

ბათუმი, ლუკა ასათიანის ქუჩა / 4.05.2023

მუნიციპალური ინსპექციის ინფორმაციით, გასულ 2022 წელს, პარკირების საფასურის გადახდის გარეშე დგომის 35 058 ფაქტი გამოავლინეს და დამრღვევები დააჯარიმეს.

ზემოთ აღნიშნული პრობლემის გამო, ასევე უცნობია 2023 წელს რამდენი მძღოლი დააჯარიმა ინსპექციამ ამ და სხვა სამართალდარღვევებისთვის [ტროტუარზე დგომა; დგომა-გაჩერებისა და სხვა ნიშნების დარღვევა; ავტობუსის გაჩერებაზე დგომა; ველობილიკზე არასწორი პარკირება და სხვა], ვინაიდან გათიშულია ის ვებგვერდიც, სადაც აღნიშნული სტატისტიკა ქვეყნდებოდა. ამ დარღვევებისთვის, როგორც ინსპექციაში გვითხრეს, დღესაც აჯარიმებენ.

მოქალაქეები კი გვწერენ, რომ ვერც [პარკირების საფასურის გარდა] სხვა ჯარიმების გადახდას ახერხებენ. როგორც „ბათუმელებმა“ გაარკვია, პარკირებასთან დაკავშირებული ჯარიმების გადახდაც, მიბმული იყო იმ სერვერს, რომელიც ამ დრომდე გათიშულია.