სტიქიის შედეგად დაზარალებულთა დასახმარებლად და ინფრასტრუქტურის აღსადგენად აჭარის ბიუჯეტიდან 10 მილიონი ლარი გამოიყოფა. ინფორმაციას ამის შესახებ აჭარის მთავრობა ავრცელებს. ეს თანხა აჭარის ექვსივე მუნიციპალიტეტზე გადანაწილდება.
„აჭარის მთავრობის თავმჯდომარემ მუნიციპალიტეტის მერებთან სამუშაო შეხვედრა გამართა და მეწყრული პროცესების შედეგად მიყენებული ზიანის, მოსახლეობის უსაფრთხო საცხოვრისით უზრუნველყოფის და ინფრასტრუქტურის აღდგენითი სამუშაოების შესახებ ინფორმაცია მოისმინა… დაზარალებულ მოქალაქეებს შესაძლებლობა ექნებათ ჩაერთონ ეკომიგრანტთა საცხოვრისით უზრუნველყოფის პროგრამაში“, – აცხადებს აჭარის მთავრობა.
მთავრობაში აცხადებენ, რომ ყურადღების გარეშე სტიქიით დაზარალებული არც ერთი მოქალაქე არ დარჩება.
მთავრობის პრესსამსახურში „ბათუმელებს“ უთხრეს, რომ კონკრეტულად როგორ გადანაწილდება ეს თანხა, ჯერ გადაწყვეტილი არ არის და დეტალები მოგვიანებით გახდება ცნობილი.
გაზაფხულის დადგომისთანავე აჭარაში მეწყრული კერები გააქტიურდა. ბოლო მონაცემებით, საშიში ზონებიდან 200-მდე ოჯახია გაყვანილი.
ვრცლად ნახეთ ამ ბმულზე:
აჭარაში 192 ოჯახი მეწყერსაშიში ზონიდან გაიყვანეს – ეს რიცხვი შესაძლოა გაიზარდოს
