დღეს, 7 სექტემბერს, კურორტ გომისმთის გზაზე მეწყერი ჩამოწვა.
კურორტთან მისასვლელი გზა ჩაკეტილია.
კურორტზე მყოფი მოქალაქეების თქმით, მეწყერი დილის საათებში ჩამოწვა კურორტზე ასასვლელი გზის დაახლოებით შუა ნაწილში.
ამ დროისთვის ადგილზე სამაშველო სამსახური მუშაობს. წინასწარი ინფორმაციით, არავინ დაშავებულა.
დამეწყრილ ტერიტორიაზე ელოდებიან ტექნიკას.
„ბათუმელები“ მეტი ინფორმაციის მისაღებად ცდილობს დაუკავშირდეს ოზურგეთის მუნიციპალიტეტის მერიის პრესცენტრს. პასუხის მიღების შემთხვევაში ინფორმაცია განახლდება.
განახლებული ინფორმაცია: გზების დეპარტამენტის ინფორმაციით, შიდასახელმწიფოებრივი მნიშვნელობის ოზურგეთი-შემოქმედი-ბჟუჟჰესი-გომისმთის საავტომობილო გზის მე-16 კმ-ზე ძლიერი ნალექის შედეგად ჩამოვიდა მიწის მასა, რის გამოც აღნიშნულ მონაკვეთზე დროებით, შესაბამისი ღონისძიებების გატარებამდე, აკრძალულია ყველა სახის ავტოტრანსპორტის მოძრაობა.
გზების დეპარტამენტის პრესცენტრში ამ ეტაპზე ვერ გვითხრეს, როდის აღდგება მოძრაობა გომისმთის გზაზე.
