დიდთოვლობის ამსახველი ფოტო, რომელიც დღეს, 24 თებერვალს, აქტიურად ვრცელდება ფეისბუქზე, ხულოს მუნიციპალიტეტის სოფელ აგარაშია გადაღებული 23 თებერვალს.
ფოტოზე ასახულია სკოლისკენ მიმავალი მასწავლებლები და მოსწავლეები.
ფოტოს ავტორი, ხატია თეთრაძე, მასწავლებელია.
მან გვითხრა, რომ ფოტოზე, „წინ, 6 წლის გაბრიელია, უკან – გაბრიელის ბებია, რომელიც აგარის საჯარო სკოლის სპორტის მასწავლებელია, ბებიას უკან კი გაბრიელის და, ბარბარე. ბარბარეს უკან ჩემი შვილია, ბოლოში კი – მასწავლებლები.
მე და რამდენიმე მასწავლებელმა მათ მივასწარით სკოლაში. რა თქმა უნდა, გზა ჩვენ გავკვალეთ.
ისე კარგად იყვნენ დაწკიპულები, თან წინ რომ გაბრიელი იყო, იმდენად სასაცილოდ ჩანდა ეს ყველაფერი… ფანჯარა გამოვაღე და ფოტო გადავიღე.
უშუალოდ მე არ ვასწავლი გაბრიელს, მაგრამ მეზობლად ვცხოვრობთ. ფოტო რომ გადავიღე, თოვდა თან, დღეს გამოიდარა“, – ამბობს ხატია თეთრაძე.
ხატია სოფელ აგარაში უკვე წლებია რაც ქართულ ენას ასწავლის. მის შესახებ გიამბეთ კიდეც „ბათუმელებში“.
„ახლახან პური გამოვაცხვე მასპინძლის სახლში. გაბრიელიც აქაა. მომიტეხე პურიო – გადაყლაპა, გადაყლაპა და აბა ეხლა დამეტოლეო. ყოველდღე მეტოლება, ჯერ ვერ დაგეწიე შენ სიმაღლეშიო – ამბობს“ – გვითხრა ხატიამ.
ფოტო/ხატია თეთრაძე
