სიახლეები

ვინ იყო ქართული ლეგიონის მებრძოლი ნოდარ ნასიროვი, რომელიც გუშინ, 12 მარტს დაკრძალეს

13.03.2024 • 4770
ვინ იყო ქართული ლეგიონის მებრძოლი ნოდარ ნასიროვი, რომელიც გუშინ, 12 მარტს დაკრძალეს

9 მარტს უკრაინაში ქართული ლეგიონის მებრძოლი ნოდარ ნასიროვი დაიღუპა საბრძოლო დავალების შესრულებისას. 27 წლის ქართველი იეზიდი, ნოდარ ნასიროვი თბილისში დაიბადა და გაიზარდა. დარჩა მამა, ძმა, მეუღლე და რამდენიმე თვის შვილი.

ქართული ლეგიონის დაღუპული მებრძოლის მამა და ძმა თბილისში ცხოვრობენ. ნოდარის მეუღლე უკრაინელია, მისი სურვილით ნოდარი კიევის ოლქში, კერძოდ ზელენი ბორში დაკრძალეს გუშინ, 12 მარტს, სოფელ კრუშინკას სასაფლაოზე.

ნოდარის თანამებრძოლების თქმით, ერთ-ერთი ჯგუფისთვის დრონების ჩამხშობი მოწყობილობა შეჰქონდათ, ამ დროს კი დაბომბვა დაიწყო. ნოდარ ნასიროვი ამოტრიალებული მანქანის ქვეშ აღმოჩნდა.

„ერთად აფხაზეთში! ერთად, ბოლომდე, საქართველოსთვის! – ეს იყო სიტყვები, რასაც საერთო დავალებების შესრულების წინ მიმეორებდა ყოველთვის. გამორჩეულად მხიარული, ერთგული და საიმედო მეგობარი იყო“ – იხსენებს ნოდარის თანამებრძოლი გვანცა.

გვანცამ და ნოდარმა ბოლო ფოტო ნოდარის დაღუპვამდე რამდენიმე საათით ადრე გადაიღეს.

თანამებრძოლების, გვანცას და ნოდარის ბოლო ერთობლივი ფოტო, ნოდარის დაღუპვამდე რამდენიმე საათით ადრე

ნოდარის მეგობარი, ევა ლომთაძე გვიყვება, რომ ქართული ლეგიონის მებრძოლი მან 2023 წლის აგვისტოში გაიცნო, უკრაინაში:

„პირველივე დანახვისას გამოარჩევდით. ვაჟა-ფშაველას პერსონაჟებს ჰგავდა კეთილშობილებით და სიტყვამოზომილობით. უზომოდ ენატრებოდა საქართველო. თებერვალში ჰქონდა დაბადების დღე, მანამდე ცოტა ხნით ადრე ჯვრისწერა გადაიხადა. ჰყავს 5 თვის გოგო. სულ იმეორებდა: ქართული უნდა ვასწავლო, წერა-კითხვა და საუბარიო. საქართველოში რომ დავბრუნდი შვილისთვის დედაენა გავუგზავნე. სოციალური ქსელებით ვეხმიანებოდით ერთმანეთს“, – ამბობს ევა.

ეს წარწერა ნოდარმა იმ დროშაზე დატოვა, რომელიც ევამ კიევიდან საქართველოში წამოიღო. ნოდარის წარწერასთან ერთად საქართველოს დროშაზე სხვა ქართველი მეომრების წარწერებიცაა.

„უკრაინაში შარშან ვიყავი. მინდოდა ჩვენი მებრძოლები მომენახულებინა. ვიყავი კიევისა და ზაპოროჟიეს ბაზებზე, თითქმის ფრონტის ხაზთან.

მაშინ გააკეთეს ქართველმა მებრძოლებმა, ბიჭებმა და გოგონებმა წარწერები ამ დროშაზე. ჩამოვიტანე როგორც ძვირფასი სახსოვარი.

ძალიან საინტერესო ბიოგრაფიის მქონე გოგოები და ბიჭები იბრძვიან უკრაინაში საქართველოდან. ბედნიერებაა, რომ ქვეყანას ასეთი მეომრები ჰყავს, მაგრამ სამწუხაროდ, საქართველოში ჯეროვნად არ არის დაფასებული მათი სახელები“, – ამბობს ნოდარ ნასიროვის მეგობარი, ევა ლომთაძე, რომელიც ქართული ენისა და ლიტერატურის მასწავლებელია ლაგოდეხის მუნიციპალიტეტში.

სქრინი ქართული ლეგიონის მებრძოლის, ნოდარ ნასიროვის ფეისბუქგვერდიდან

გადაბეჭდვის წესი


ასევე: