არასამთავრობო ორგანიზაცია „ბათუმის დამოუკიდებელი ცხოვრების ცენტრის“ ინიციატივით, აჭარაში ახალი პროგრამა შემუშავადა, რომლის ფარგლებშიც შშმ ორსული ქალები და 1 წლამდე ასაკის ბავშვის დედები ერთჯერად ფინანსურ დახმარებას – 2 ათას ლარს მიიღებენ.
საპილოტე პროგრამა უკვე გათვალისწინებულია აჭარის ბიუჯეტში და ამ ეტაპზე მხოლოდ 20 ბენეფიციარისთვის არის გათვლილი.
თუმცა, როგორც ორგანიზაციის ერთ-ერთი წარმომადგენელი დეა ერემაშვილი „ბათუმელებთან“ ამბობს, პროგრამას სხვა შშმ პირები უარყოფითად გამოეხმაურნენ, რაც დეა ერემაშვილის თქმით, საფრთხეს უქმნის შშმ დედებისა და ქალებისთვის ძალიან მნიშვნელოვანი პროგრამის საბოლოოდ დანერგვას.
„შშმ კაცები მიიჩნევენ, რომ ასეთი პროგრამა დისკრიმინაციულია, რადგან მხოლოდ ქალებს ეხება, პროტესტი გამოხატეს შშმ ბავშვების მშობლებმაც. გვწერენ – ჩვენმა ბავშვებმა რა დააშავეს, მათაც სჭირდებათ დახმარებაო ,“ – გვითხრა დეამ.
მისი თქმით, შშმ დედებისა და ორსული ქალების დახმარების პროგრამა ვერანაირად ვერ იქნება დისკრიმინაციული, რადგან ორსულ შშმ ქალებს სპეციფიკური საჭიროებები აქვთ და ეს მათთვის სასიცოცხლოდ მნიშვნელოვანია.
„შშმ კაცებისთვის, ასევე შშმ ბავშვებისთვის, არაერთი პროგრამა შევიმუშავეთ და დავნერგეთ. იქნება ეს პედიატრიული სამედიცინო ეტლების გადაცემა, სამედიცინო ამწე, ადაპტირებული ტრანსპორტი, ადაპტირებული პლაჟი თუ სხვა, შშმ ქალებისთვის კი, ფაქტობრივად, არ იყო აქამდე არანაირი პროგრამა და რამდენიმეწლიანი მუშაობის შემდეგ, ძლივს მოვახერხეთ, რომ ეს საპილოტე პროგრამა ბიუჯეტში ჩაესვა აჭარას.
არა მარტო საქართველოში, ზოგადად, მსოფლიოში, შშმ ქალები უფრო მოწყვლად ჯგუფად მიიჩნევიან, ვიდრე კაცები, რადგან შშმ ქალებს განსაკუთრებული საჭიროება აქვთ. ხშირია შემთხვევა, როდესაც შშმ ქალები ორმაგი დისკრიმინაციის მსხვერპლნი არიან.
არ აქვთ ხელმისაწვდომი ჯანდაცვა და უამრავი წინაღობა ხვდებათ ორსულობის პერიოდში. მინიმალური სერვისი რომ მიიღონ, ამისთვის გაკეთდა ეს პროგრამა“, – ამბობს დეა ერემაშვილი.
მისი თქმით, შშმ ორსული ქალის მდგომარეობა ბევრად უფრო რთულია, ვიდრე სხვა ქალის, რადგან შშმ ქალს ბევრი თანმდევი დაავადება აქვს, სჭირდება დამატებითი მედიკამენტები, ვიტამინი და ასე შემდეგ.
„შშმ დედას მინიმუმ სჭირდება დამხმარე, რომლის დაქირავების რესურსი ფიზიკურად შეიძლება არ ჰქონდეს. ამიტომ ასეთი მიდგომა, რომ რატომ ქალებს და კაცებს ან ბავშვებს არა, არ არის სწორი.
ბავშვების ეტლების პროგრამა რომ დავანერგინეთ, არ უნდა გაგვეკეთებინა, რადგან ზრდასრულებს არ გვეხება? ის შშმ ბავშვი არ გაიზრდება და ზრდასრული ქალი არ გახდება? მაშინ არ დასჭირდება მხარდაჭერა? რადგან მე არ მეხება – ამ ლოგიკით არ უნდა გამოვიდეთ, რადგან ეს კეთდება გათანაბრებისთვის და ყველა პროგრამა ყველა შშმ კატეგორიას ვერ მოერგება ყოველთვის. ეს შეუძლებელია,“ – ამბობს დეა.
საპილოტე პროგრამის ფარგლებში შშმ ქალი ფინანსურ დახმარებას იღებს ორჯერ – ორსულობის პერიოდში და ბავშვის გაჩენის შემდეგ.
„შშმ კაცები მსოფლიო მოსახლეობის 12 პროცენტია, ქალები კი – 19.2 პროცენტი. საქართველოში, ერთ მილიონ ქალში 47 ათასი შშმ ქალია, რაღაც ნაწილს კი სტატუსიც არ აქვს, რადგან სტიგმატიზებულია შშმ პირობა ქალისთვის და ზოგჯერ ოჯახებიც კი არ მიმართავენ რეგისტრაციას.
მესმის, რომ შშმ პირების ხელშემწყობი პროგრამები არ არის საკმარისი, მაგრამ სხვა რეგიონებთან შედარებით, აჭარაში ბევრად უკეთესი მდგომარეობაა და ვცდილობთ, ამ მდგომარეობის გაუმჯობესებას“.
საპილოტე პროგრამა დამტკიცებულია და მისი მთლიანი ბიუჯეტი წლიურად 40 ათასი ლარია.
