მთავარი,სიახლეები

„გაგვითვალისწინეთ, ნუ ჩაგვიხერგავთ ტროტუარებს“- 5 ქუჩის მონიტორინგი ბათუმში

14.03.2024 • 3894
„გაგვითვალისწინეთ, ნუ ჩაგვიხერგავთ ტროტუარებს“- 5 ქუჩის მონიტორინგი ბათუმში

საინიციატივო ჯგუფი „გამითვალისწინე“ ბათუმის ქუჩების მონიტორინგს იწყებს.

აქტივისტები ამოწმებენ, რამდენად ადაპტირებულია ქუჩები და ტროტუარები ეტლით მოსარგებლე და სხვა შეზღუდვის მქონე პირებისთვის.

„ბათუმელები“ საინიციატივო ჯგუფის ერთ-ერთ წევრს, ნიკო ქარცივაძეს ესაუბრა.

„ბათუმში გადაადგილება შშმ პირებისთვის ძალიან რთულია, რადგან თითქმის ჩახერგილია ტროტუარები ავტომანქანებით და ეტლით მოსარგებლე პირებს აღარ ეძლევათ უსაფრთხოდ გადაადგილების შესაძლებლობა.

გარდა ამისა, ძალიან ხშირად ავტომანქანები დგას ავტობუსის გაჩერებებზე, რის გამოც ავტობუსის მძღოლი ვეღარ ახერხებს ტროტუართან ახლოს მისვლას და პანდუსის გაშლას, ეტლით მოსარგებლე დაბრკოლებების გარეშე რომ ავიდეს ავტობუსში.

„გამითვალისწინეს“ მონიტორინგი მელიქიშვილის ქუჩაზე/ ბათუმი, 14 მარტი.

ხშირად არც ავტობუსის მძღოლებს აქვთ ინფორმაცია, თუ როგორ გაუწიონ სწორად დახმარება შშმ პირებს, რომ ტროტუართან ახლოს უნდა დააპარკინგონ ავტობუსი და ასე შემდეგ, ამიტომ ასეთ საკითხებზე ავტობუსის მძღოლებს სამდღიანი ტრენინგი ჩავუტარეთ და ვფიქრობ, მოჰყვება შედეგი“, – ამბობს ნიკო ქარცივაძე.

პროექტის კიდევ ერთი აქტივობა მოიცავს ქუჩების მონიტორინგს.

აქტივისტებმა სულ ცოტა ბათუმის ხუთი ცენტრალური ქუჩა უნდა შეისწავლონ და გადაამოწმონ, რამდენად არის დაცული ამ ქუჩებსა და ტროტუარებზე შშმ პირთა გადაადგილების უფლება.

დღეს, 14 მარტს, აქტივისტებმა მელიქიშვილის ქუჩის მონიტორინგი ჩაატარეს.

ავტომანქანებით ჩახერგილი მელიქიშვილის ქუჩა ბათუმში.

„კამპანია წამოვიწყეთ – „არა, ტროტუარების ოკუპაციას“, რომლის ფარგლებშიც გვაქვს ხუთი ქუჩა აღებული – ნინოშვილი, მელიქიშვილი, რუსთაველი, ბარათაშვილი და გორგილაძის ქუჩები.

ამ ქუჩების არჩევა იმანაც განაპირობა, რომ აქ გადაადგილდებიან ძირითადად შშმ ადამიანები საგანმანათლებლო სივრცეებთან მისასვლელად. შესაბამისად, შშმ პირების განათლების უფლება რომ რეალიზდეს, ეს ქუჩებიც თავისუფალი უნდა იყოს ამ არასწორი პარკირებებისგან“, – ამბობს ნიკო.

მისი თქმით, პროექტში ახალგაზრდა მოხალისეები ჰყავთ ჩართული, რომლებიც საინიციატივო ჯგუფს ფლაერების დარიგებაში ეხმარებიან.

„ამ ბროშურებს, სადაც შშმ პირთა გადაადგილების უფლებებზეა საუბარია, ავტომანქანის საქარე მინებზე ვტოვებთ, რომ არასწორი პარკირება საფრთხეს უქმნის და ზღუდავს როგორც შშმ პირთა, ასევე სხვა ადამიანების გადაადგილების უფლებას.

ავტომანქანები ხშირად ხერგავენ ავტობუსის გასაჩერებელ ადგილსაც, რის გამოც შშმ პირებს უჭირთ ტრანსპორტში ასვლა.

მონიტორინგის დროს საკმაოდ ბევრი ავტომობილი შეგვხვდა არასწორად დაპარკინგებული. გვქონდა შემთხვევა, როცა ადგილზე გავესაუბრეთ მძღოლებს და შევეცადეთ, რომ მათი ცნობიერება გაგვეზარდა ამ მხრივ, თუმცა არის შემთხვევები, როცა ღიზიანდებიან ავტომანქანის მფლობელები შენიშვნაზე და უკმაყოფილებას გამოხატავენ.

ჩვენი მიზანია, ადამიანებს გავუჩინოთ პირადი პასუხისმგებლობა, რადგან სწორედ მათი ქმედებების გამო სხვათა უფლებები ილახება. გვინდა, უფრო მეტად დავაფიქროთ ამაზე“, – ამბობს ნიკო ქარცივაძე.

ქუჩების მონიტორინგი ორი თვე გაგრძელდება. პროექტი ევროკავშირის მხარდაჭერით ხორციელდება.

გადაბეჭდვის წესი


ასევე: