ნეტგაზეთი • RU

გარდაიცვალა 19 წლის კაცი, რომელიც წუხელ ბულვარში ცეცხლსასროლი იარაღით დაჭრეს

გარდაიცვალა კაცი, რომელიც წუხელ ბულვარში ცეცხლსასროლი იარაღით დაჭრეს. ინფორმაციას კლინიკა „მედცენტრი“ ადასტურებს. კლინიკის პრესცენტრის ინფორმაციით, გარდაცვლილი 19 წლის მამაკაცია.

ბულვარის ცენტრალურ შესასვლელთან, ერთი-ერთ რესტორანთან, წუხელ შეიარაღებული კონფლიქტის დროს სულ 4 ადამიანი დაშავდა, მათგან ერთი თავის და გულ-მკერდის არეში იყო დაჭრილი.

კლინიკა „მედცენტრის“ პრესცენტრის ინფორმაციით, დაჭრილი კაცი კლინიკაში შეყვანიდან დაახლოებით ერთ საათში გარდაიცვალა. კლინიკაში კიდევ ორი ადამიანი შეიყვანეს, ერთი კაცი სასწრაფო-სამედიცინო სამსახურმა შეიყვანა, ქალი კი, თვითდინებით მიიყვანეს. მათ სამედიცინო მომსახურება უკვე გაუწიეს და კლინიკიდან გაწერეს.

გარდაცვლილი კაცი და დაშავებულებიც უცხო ქვეყნის მოქალაქეები არიან.

შეიარაღებული კონფლიქტის შედეგად კიდევ ერთი დაშავებული კლინიკა BAU-ში გადაიყვანეს, მას შუშის ნამსხვრევები ჰქონდა მოხვედრილი სხეულზე და კლინიკიდან უკვე გაწერილია. ეს დაშავებული საქართველოს მოქალაქეა.

შინაგან საქმეთა სამინისტროს ინფორმაციით, გამოძიება დაიწყო სისხლის სამართლის კოდექსის 19-109-ე [განზრახ მკვლელობის მცდელობა] და 236-ე [ცეცხლსასროლი იარაღის უკანონო ტარება] მუხლების შესაბამისად.

ნეტგაზეთის მასალების სხვა გამოცემებში გადაბეჭდვის წესი
ავტორი