ნეტგაზეთი • RU

„ხმები ომზე“, პოეზია, დისკუსიები – ოდესის ლიტერატურული ფესტივალის პირველი დღე ბათუმში

დღეს, 5 ოქტომბერს, ბათუმში ოდესის ლიტერატურული ფესტივალი იწყება, რომელიც უკრაინაში მიმდინარე საომარი მოქმედებების გამო წელს ბათუმში იმართება.

ოთხი დღის განმავლობაში ბათუმში, ფესტივალის ფარგლებში მასტერკლასები, დისკუსიები, ახალი წიგნების პრეზენტაციები და ავტორებთან შეხვედრები გაიმართება. ღონისძიებების დიდი ნაწილი ღიაა და მასზე დასწრება ყველა მსურველს შეუძლია.

დღევანდელი, 5 ოქტომბრის პროგრამა ასე გამოიყურება:

  • 12:00-14:00 საათზე – „თარგმანში დაკარგული და ნაპოვნი“ – კატია ვოლტერსის მთარგმნელობითი მასტერკლასი

ეს არის ფესტივალის ფარგლებში დაგეგმილი დახურული ღონისძიება სტუდენტებისთვის.

ქართველი მთარგმნელი კატია ვოლტერსი ცხოვრობს ფრაიბურგში, გერმანულ ენაზე თარგმნილი აქვს ლუკა ბაქანიძის, ალეკო შუღლაძის, ნატო ინგოროყვას, დათო ტურაშვილისა და სხვა ქართველი მწერლების ნაწარმოებები; ქართულ ენაზე თარგმნა გაბრიელ გარსია მარკესისა და ხორხე ლუის ბორხესის ნაწარმოებები. მასტერკლასი საშუალებას მისცემს სტუდენტებს, ლიტერატურული თარგმანის პირველი გამოცდილება შეიძინონ.

კატია ვოლტერსი მონაწილეობას მიიღებს ონლაინ.

მასტერკლასის მოდერატორია მარიამ კორინთელი.

მასტერკლასი ბათუმის სახელმწიფო უნივერსიტეტში, 32-ე აუდიტორიაში გაიმართება.

  • 13:00-14:00 საათზე – „საფრთხეშია თუ არა სიტყვის თავისუფლება?“ – დისკუსია დეიმონ გალგუტთან

ეს ონლაინღონისძიება იქნება.

სამხრეთ აფრიკელი ავტორი, დეიმონ გალგუტი, ბუკერის პრემიის მფლობელი (2021) რომანისთვის „დაპირება“, ისაუბრებს იმ სირთულეებზე, რაც მკაცრი რასობრივი დისკრიმინაციის ეპოქიდან დემოკრატიულ საზოგადოებამდე გარდაქმნას ახლდა თან.

დისკუსიის მოდერატორია იულია სუშჩენკო. დისკუსია ინგლისურ ენაზე გაიმართება.

პირდაპირი ეთერის ნახვა შეგიძლიათ ბმულზე – https://www.facebook.com/InternationalesLiteraturfestivalOdesa

  • 16:30 – 17:30 საათზე – „ხმები ომზე“ 

ბათუმის საზაფხულო თეატრში ფესტივალის ფარგლებში ფილმის ჩვენება გაიმართება.

ფილმი „ხმები ომზე“ წარმოგვიდგენს მწერლებს მსოფლიოს სხვადასხვა ქვეყნიდან, რომლებიც საუბრობენ ომზე უკრაინაში. მათ შორის არიან მარგარეტ ეტვუდი, კარლ შლოგელი, ჰერტა მიულერი და ბევრი სხვა ავტორი.

  • 16:30-18:00 საათზე – „TÜK“ / საუბარი არტ ანტონიანთან 

ეს ონლაინღონისძიებაა. არტ ანტონიანი უნგრელ-უკრაინელი ჟურნალისტი, ტელეწამყვანი, მსახიობი და მწერალია.

დისკუსია უკრაინულ ენაზე გაიმართება და მისი მოდერატორია იულია სუშჩენკო.

  • 19:30-20:30 საათზე – ფესტივალის გახსნის ცერემონიალი და დისკუსია პულიცერის პრემიის მფლობელ ავტორთან, ისტორიკოს ენნ ეპლბაუმთან

ფესტივალის გახსნის ცერემონია ბათუმის საზაფხულო თეატრში გაიმართება და მასზე დასწრება თავისუფალია.

ბათუმში ოდესის ლიტერატურულ ფესტივალს ონლაინ გახსნის სიტყვით ენნ ეპლბაუმი, მრავალი ჯილდოს, მათ შორის, პულიცერის პრემიის მფლობელი ამერიკელი ისტორიკოსი, რომლის ნარკვევი, „წითელი შიმშილი“ ეხება ჰოლოდომორს, რომელმაც 1930-იან წლებში უკრაინაში რამდენიმე მილიონი ადამიანი იმსხვერპლა.

ოფიციალური მიმართვის შემდეგ დისკუსია გაიმართება, რომლის მოდერატორი მაია ფანჯიკიძე იქნება.

  •  20:45-22:30 საათზე – ქართულ-უკრაინული პოეზიის საღამო

ქართულ-უკრაინული პოეზიის საღამო ბათუმის საზაფხულო თეატრში გაიმართება.

I ნაწილი – პაატა შამუგია, ოსტაპ სლივინსკი, გიორგი ლობჟანიძე, ჰალინა კრუკი;

II ნაწილი – დმიტრო ლაზუტკინი, ნიკა ჯორჯანელი, რაულ ჩილაჩავა, ჰალინა პეტროსანიაკი, ია კივა.

დმიტრო ლაზუტკინი მონაწილეობას მიიღებს ონლაინ.

პოეზიის საღამოს მოდერატორი ჟურნალისტი და პოეტი ეკა ქევანიშვილი იქნება.

პირდაპირი ეთერის ნახვა შეგიძლიათ ბმულზე – https://www.facebook.com/InternationalesLiteraturfestivalOdesa.

____________________

ბათუმში ოდესის VIII საერთაშორისო ლიტერატურული ფესტივალი 8 ოქტომბრამდე გაგრძელდება. „ბათუმელები“, რომელიც ფესტივალის მედიაპარტნიორია, ყოველდღიურად შემოგთავაზებთ ფესტივალის ანონსს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.