მთავარი,სიახლეები

„კლუბის გზას რომ ვადგავარ, ყველა პრობლემა ქრება“ – მკითხველთა კლუბი ათწლიანი ისტორიით

05.03.2024 • 3203
„კლუბის გზას რომ ვადგავარ, ყველა პრობლემა ქრება“ – მკითხველთა კლუბი ათწლიანი ისტორიით

„მკითხველთა და კრიტიკოსთა კლუბი“ უკვე 10 წელზე მეტია ბათუმში აერთიანებს ადამიანებს, რომლებსაც სურთ წაკითხულ წიგნებსა და ნანახ ფილმებზე ერთმანეთთან საუბარი. კლუბს ხელმძღვანელობს ქართული ენისა და ლიტერატურის მასწავლებელი, მასწავლებელთა ეროვნული ჯილდოს ფინალისტი მაია მენაბდე. კლუბის მართვაში აქტიურად არიან ჩართული თავად მონაწილეებიც: ისინი პერიოდულად გეგმავენ სხვადასხვა აქტივობას, წარადგენენ წიგნებს, აქვეყნებენ ინფორმაციას სოციალურ ქსელში და აორგანიზებენ შეხვედრებს.

ანა დევაძე 4 წელია, რაც კლუბის წევრია, ბოლო ერთი წელია კი ორგანიზატორის მოვალეობებსაც ასრულებს. მას სურს, რომ მისი ორგანიზატორობის წლები კლუბის წევრებისთვის გამორჩეული და დასამახსოვრებელი იყოს:

“ყველა ამბობს, რომ „პარასკევი არის მათთვის საუკეთესო დღე“ და როცა კლუბის გზას ადგანან, „ყველა პრობლემა ქრება“ – ეს არის ადგილი, სადაც საყვარელ თემებზე საუბრობენ”.

ანა დევაძე

გასულ პარასკევს მკითხველთა და კრიტიკოსთა კლუბში განიხილეს ხალიდ ჰოსეინის „ფრანით მორბენალი“ – წიგნი, რომელშიც მოთხრობილია გასული საუკუნის 70-იანი წლების ბოლოს ავღანეთში მიმდინარე მძიმე მოვლენები. წიგნი ანამარია გორგილაძემ და თამთა სურმანიძემ წარადგინეს. მოძიებული ჰქონდათ საინტერესო ფაქტები მწერლის ცხოვრების შესახებ. ასევე განხილვის ბოლოს მათ მოაწყვეს ვიქტორინაც:

„ეს ჩვენი პირველი წარდგენა იყო კლუბში, თუმცა იმდენად შეჩვეული ვარ გარემოს და ბავშვებს, რომ საერთოდ არ მინერვიულია. კომპლიმენტებიც კი მივიღეთ ბავშვებისგან“, – გვითხრა ანამარია გორგილაძემ.

ანამარია და თამთა

როგორც პედაგოგი მაია მენაბდე ამბობს, 10 წლის წინ ყველაფერი დაიწყო იმით, რომ მან იმხანად მერვე კლასის მოსწავლეებს დაავალა გადაეღოთ ფილმი წიგნის მაღაზიებსა და ბიბლიოთეკებზე, ჩაეწერათ ინტერვიუები:

„ამ ფილმზე მუშაობით იმხელა სიამოვნება მიიღეს ბავშვებმა, რომ დავინახეთ, გვჭირდებოდა საერთო სივრცე, სადაც შევიკრიბებოდით და ვისაუბრებდით წიგნებზე, ლიტერატურაზე და არა მხოლოდ ლიტერატურაზე.

ჩვენ განვიხილავთ როგორც ქართულ, ისე უცხოურ ლიტერატურას. ვუყურებთ როგორც ქართულ, ისე უცხოურ ფილმებს. იდეა კი ისაა, რომ ბავშვებმა დაინახონ პარალელი – ჩვენ მოწყვეტილი კი არ ვართ სივრცეს, არამედ ნაწილი ვართ ერთი მთლიანი კულტურული სივრცის – ევროპული სივრცის; ღირებულებები არის საერთო, რომ ადამიანებს ყველგან საერთო საწუხარი, საერთო ინტერესები აქვთ, რომ არსებობს ისეთი პრინციპები, რომლებსაც ყველგან თანაბრად შეგიძლია უერთგულო.

კლუბი ბავშვებისთვის არის ფიქრების გაზიარების, რაღაც ისეთზე საუბრის ადგილი, რაზეც სხვაგან არ საუბრობენ. მოზარდმა უნდა გაიაზროს, რომ ლიტერატურაც სინამდვილეში არის ინსტრუმენტი იმისთვის, რომ მიეჩვიო კრიტიკულ აზროვნებას, კითხვების დასმას, ცხოვრებისეულ წინააღმდეგობებს შეხვდე უფრო მზად“, – ამბობს მაია მენაბდე.

მაია მენაბდე

იმავეს ფიქრობს ეკატერინა ტერატურიანი, მისი თქმით წიგნების კითხვით ერთის ნაცვლად ათასი ცხოვრებით შეგიძლია იცხოვრო, მიიღო ისეთი გამოცდილებები, რაც შეიძლება რეალურ ცხოვრებაში შენთვის მიუწვდომელი იყოს:

ეკატერინა ტერატურიანი

„წიგნის კითხვა იმდენად პირადული პროცესია, რომ ამისთვის აუცილებელია მარტოობასთან შეგუება, მარტოობის სიყვარული; ჩემი აზრით, ეს ძალიან მნიშვნელოვანი უნარია ადამიანისთვის. ამის საპირწონედ წიგნის სიყვარული აერთიანებთ ადამიანებს და იქმნება ასეთი კლუბები, რათა ერთმანეთს გავუზიაროთ შთაბეჭდილებები, მოვუსმინოთ ერთმანეთს და მივიღოთ სიახლეები“ – ამბობს ეკა.

კლუბში გაწევრიანება შეუძლია ნებისმიერი სკოლის მოსწავლესა და სტუდენტს. ანა თურმანიძე მამიდას რჩევით გაწევრიანდა კლუბში. ადრე წიგნებს მხოლოდ მაშინ კითხულობდა, როცა სკოლაში ავალებდნენ, ახლა კი, კლუბში მოსვლის შემდეგ, უფრო აქტიური მკითხველი გახდა:

ანა თურმანიძე

„კარგია, რომ კლუბი არ არის მხოლოდ მაიას ან ამ სკოლის მოსწავლეებისთვის განკუთვნილი. ნებისმიერი სკოლის მოსწავლეს შეუძლია მოვიდეს, განიხილოს წიგნები და ფილმები. ვფიქრობ, ეს დიდი ფუფუნებაა ბათუმელი ბავშვებისთვის“, – ამბობს ანა.

გადაბეჭდვის წესი


ასევე: