ნეტგაზეთი • RU

ვითხოვთ საკრებულოს რიგგარეშე სხდომას და BIAFF-ის დაფინანსებას – ენმ

„ვითხოვთ საკრებულოს რიგგარეშე სხდომას და ბათუმის კინოფესტივალისთვის შესაბამისი დაფინანსების გამოყოფას,“ – აცხადებს ლაშა კილაბერია, ბათუმის საკრებულოს ფრაქცია „ერთიანი ნაციონალური მოძრაობის“ თავმჯდომარე.

რიგგარეშე სხდომის მოთხოვნით განცხადება ოპოზიციამ საკრებულოს აპარატს დღეს, 6 სექტემბერს ჩააბარა და ბრიფინგით გააპროტესტა ბათუმის კინოფესტივალის დაფინანსების გარეშე დატოვება. ერთ კვირაში საკრებულოს სხდომა ჩაინიშნება, თუმცა ლაშა კილაბერია არ გამორიცხავს, რომ სხდომას უმრავლესობის წევრები მიზანმიმართულად არ დაესწრონ, ან მხარი არ დაუჭირონ კინოფესტივალისთვის დაფინანსების გამოყოფას.

„საკრებულო რომ ვერ შეიკრიბა, რაც თქვენთან ინტერვიუში სოფო ხალვაშმა ჩვენ დაგვაბრალა, არის „ქართული ოცნების“ ბრალი, რადგან ისინი უცხადებდნენ ბოიკოტს საკრებულოს სხდომებს… რადგან ეს ფორსმაჟორია, ვითხოვთ, პირდაპირ ფესტივალის დაფინანსებას დავუჭიროთ მხარი,“ – გვითხრა ლაშა კილაბერიამ.

„ეს ფესტივალი უკვე ბათუმის სახეა და საუკეთესო საშუალებაა ქალაქის და ტურიზმის პოპულარიზაციისთვის… ეს აჩვენებს იმას, რომ წულუკიანი სჯის ყველას, თუკი ადამიანები ღიად არ დაუჭერენ „ოცნებას“ მხარს,“ – ამბობს ლევან გორგილაძე, ფრაქცია ენმ-ის სპეციალისტი ბათუმის საკრებულოში.

BIAFF -ის გახსნა წელს 18 სექტემბერსაა დაგეგმილი. ეს ფესტივალი წინა წლებშიც სექტემბერში ტარდებოდ

BIAFF-ი წელს მეჩვიდმეტედ იმართება. კინოფესტივალის ოფიციალური პარტნიორი გასული 16 წელი ბათუმის მერია იყო. ეს პირველი წელია, როცა კინოფესტივალის მხარდამჭერი ბათუმის მერია არ არის. კინოფესტივალის დაფინანსებაზე წელს უარი თქვა საქართველოს კულტურის სამინისტრომ და ეროვნულმა კინოცენტრმა, ასევე აჭარის განათლების, კულტურისა და სპორტის სამინისტრომ.

5 სექტემბერს, ბათუმის მერის მოადგილემ სოფო ხალვაშმა „ბათუმელებთან“ თქვა, რომ BIAFF-ის დაფინანსების გარეშე დარჩენა უკავშირდება იმას, რომ საკრებულო დროულად ვერ შეიკრიბა და საფესტივალო კონკურსი დაგვიანებით გამოცხადდა, თუმცა ბათუმის მერიაში საფესტივალო კონკურსის განაცხადების მიღების დასრულებამდე BIAFF-ის მენეჯერს უთხრეს, რომ ბიუჯეტი უკვე ამოიწურა, მიუხედავად იმისა, რომ BIAFF-მა საკონკურსო განაცხადი მერიაში 3 აგვისტოს წარადგინა, აპლიკაციების წარდგენა კი აგვისტოს ბოლომდე იყო შესაძლებელი.

დღეს, 6 სექტემბერს, დაიწყო ფესტივალისთვის თანხის შეგროვების მხარდამჭერი კამპანია სლოგანით -„ერთად ჩავატაროთ BIAFF-ი“.

____________

ფოტოზე: ბათუმის საკრებულო.

ამ თემაზე:

BIAFF-ი 2 კვირაში იწყება, დაფინანსება კი არ აქვს. რა ხდება? – ინტერვიუ მენეჯერთან

 

ნეტგაზეთის მასალების სხვა გამოცემებში გადაბეჭდვის წესი
ავტორი