ნეტგაზეთი • RU

ერთად ჩავატაროთ „ბიაფი“ – დაიწყო კამპანია ბათუმის კინოფესტივალის მხარდასაჭერად

საავტორო კინოს ბათუმის საერთაშორისო ფესტივალმა, BIAFF-მა, კამპანია დაიწყო ფესტივალის ფინანსური მხარდაჭერისთვის.

#ერთადჩავატაროთბიაფი – ამ ჰეშთეგით ბათუმის კინოფესტივალი ერთგულ მაყურებლებსა და საავტორო კინოს გულშემატკივრებს მხარდაჭერისკენ მოუწოდებს.

საავტორო კინოს საერთაშორისო ფესტივალი ბათუმში უკვე 17 წელია იმართება, თუმცა წელს პირველად, ამ დრომდე, ფესტივალს არ აფინანსებს არც ერთი სახელმწიფო სტრუქტურა. ფესტივალის მხარდამჭერი ამ დროისთვის მხოლოდ რამდენიმე ქვეყნის საელჩო და ორგანიზაციაა, სწორედ ამიტომ მიმართავს BIAFF-ი საზოგადოებას ფინანსური მხარდაჭერის თხოვნით.

„წელს, ბათუმის კინოფესტივალი თავისი ისტორიის მანძილზე, პირველად იმყოფება მსგავს ფინანსურ გასაჭირში. ფესტივალის მხარდამჭერების სიას გამოაკლდა ყველა სამთავრობო სტრუქტურა – საქართველოს კულტურის სამინისტრო, საქართველოს ეროვნული კინოცენტრი და ასევე, ჩვენდა გასაკვირად ფესტივალმა უარი მიიღო აჭარის კულტურის სამინისტროდანაც,“- წერს კინოფესტივალის მენეჯმენტი.

„ალბათ ყველა კინომოყვარული და ბათუმელი დაგვეთანხმება, რომ #BIAFF-ი აუცილებლად უნდა ჩატარდეს ბათუმში და ამას ერთად შევძლებთ!

აჭარის კულტურის სამინისტროსთან უშუალო კომუნიკაციისას გამოითქვა დაპირება, რომ მოხდებოდა არსებული ფინანსების გადახედვა და მცირე ფინანსური მხარდაჭერის მოძიება, თუმცა დღემდე ეს ვერ მოხერხდა.

ბათუმის მერიის მიერ ფესტივალების კონკურსში #BIAFF-მა 3 აგვისტოს შეიტანა ყველა საჭირო დოკუმენტაცია, მათ შორის, თანადაფინანსების წერილები – მერიისგან მოთხოვნილი თანხაზე (88 000 ლარი) უფრო მეტი თანადაფინანსება იქნა მოპოვებული საელჩოებისგან და ჩვენი უცხოელი პარტნიორებისგან (საშუალოდ 115 000 ლარი), რაც მნიშვნელოვანი პლუსია.

თუმცა, ამის მიუხედავად, ბათუმის მერიიდან გვაცნობეს, რომ ფესტივალების საკონკურსო ბიუჯეტი ამოიწურა, რადგან დაფინანსდა სხვა ფესტივალები და ბათუმის კინოფესტივალი ვერ დაფინანსდებოდა. ასევე, ნახსენები იყო, რომ შესაძლოა განიხილონ თანხის დამატება ფესტივალების კონკურსისთვის.

იმედი გვაქვს, ბათუმის მერია, რომელიც ფესტივალის დაარსების დღიდან უცვლელი პარტნიორია, წელსაც მხარს დაუჭერს #BIAFF-ის კინოფესტივალს, რომელიც გადაჭარბების გარეშე შეიძლება ითქვას, რომ წარმოადგენს ბათუმის სავიზიტო ბარათს და კინომოყვარულებისთვის უმნიშვნელოვანეს საერთაშორისო ღონისძიებას,“ – წერს კინოფესტივალის მენეჯმენტი.

საავტორო კინოს ბათუმის საერთაშორისო ფესტივალი ხელოვანთა სახლმა „არგანმა“ დააარსა 2006 წელს. იქიდან მოყოლებული ბათუმში კინოფესტივალი ყოველწლიურად იმართება და ქალაქის ერთ-ერთი ყველაზე მნიშვნელოვანი კულტურული ღონისძიებაა, რომელიც ზაფხულის ტურისტული სეზონის დასასრულს ქალაქში იზიდავს ტურისტებს, კულტურის სფეროს წარმომადგენლებსა და საავტორო კინოს მოყვარულებს.

კინოფესტივალი საერთაშორისოა და 16 წლის განმავლობაში მას არაერთი ცნობილი რეჟისორი ესტუმრა. მათ შორის: იოს სტელინგი, აბას კიაროსტამი, ქშიშტოფ ზანუსი, ზბიგნევ რიბჩინსკი, მიხეილ კობახიძე და ა.შ.

 

  • როგორ შეგიძლიათ დაეხმაროთ BIAFF-ს?

კინოფესტივალის მხარდასაჭერად თანხის ჩარიცხვისთვის შეგიძლიათ გამოიყენოთ:

  • საბანკო ანგარიში. მიმღები – ა(ა)იპ „ბათუმის ხელოვანთა სახლი არგანი“
    საქართველოს ბანკის ანგარიშის ნომერი – GE64BG0000000538117440
    დანიშნულებაში აუცილებლად ჩაწერეთ – „შემოწირულობა“
  • ფანდრაიზინგის ონლაინ პლატფორმა აქ შეგიძლიათ მარტივი რეგისტრაცია facebook-ის ანგარიშით და თანხის გადარიცხვა VISA/Mastercard ბარათით
  • Paypal გადარიცხვისთვის – biaffbatumi@gmail.com
  • Crypto / კრიპტო ანგარიში – კრიპტოს გადმორიცხვისთვის შეგიძლიათ გამოიყენოთ ერთ-ერთი ვარიანტი:
    USDT – TS4peK914jrCeV41tgbq1wDzLx81TYFRSP
    MATIC – 0x44fa17ee7a5ffb15fd9e5450437aeaa7e7a8997d

ბიაფის კინოფესტივალის პრომო მასალების/აბონემენტის შეძენა  [ბმულის გასახსნელად დაკლიკეთ]
1. ბიაფის მაისური – 45 ლარი
2. ბიაფის ჩანთა – 35 ლარი
3. ბიაფის აბონემენტი – 60 ლარი (აბონემენტის მფლობელს ექნება კინოსეანსზე დასწრებისთვის გარანტირებული ადგილი)
4. ბიაფის დახურვის ცერემონიაზე და ბანკეტზე დასწრების ვაუჩერი – 100 ლარი (1 პერსონაზე)

შეგიძლიათ მონიშნოთ რამდენიმე, თუ რამდენიმეს შეძენას აპირებთ – თანხის გადარიცხვა შეგიძლიათ ზემოთ მითითებულ საბანკო ანგარიშზე, დანიშნულებაში ჩაწერთ, თუ რისი შეძენა გსურთ და შემდეგ გამოაგზავნით გადარიცხვის საბუთს ელ.ფოსტაზე – info@biaff.org.

___________________

ამ თემაზე:

რატომ არ დააფინანსეს BIAFF-ი? – „გადაწყვეტილება მიიღება პოლიტიკური მორჩილების მიხედვით“

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com