აჭარის ჯანდაცვის სამინისტრომ ღვიძლის ტრანსპლანტაციის დაფინანსება 10 000 ლარით გაზარდა და ახლა ბათუმში რეგისტრირებულ მოქალაქეებს სამედიცინო მომსახურება სამინისტროს მიერ 80 000 ლარით უფინანსდებათ, დამატებით 30 000 ლარს მათთვის ბათუმის მერია გამოყოფს, ხოლო აჭარის სხვა მუნიციპალიტეტებში რეგისტრირებული მოქალაქეებისთვის 110 000 ლარს მთლიანად აჭარის ჯანდაცვის სამინისტრო გასცემს.
შესაბამისად, აჭარაში ღვიძლის გადანერგვის ოპერაციის ღირებულების 88 პროცენტს ბიუჯეტი ფარავს.
აჭარის ჯანდაცვის სამინისტრო ღვიძლის ტრანსპლანტაციას 2016 წლიდან აფინანსებს. მაღალტექნოლოგიური სამედიცინო მომსახურება დღემდე სამინისტროს დაფინანსებით 34 პაციენტს ჩაუტარდა, გამოყოფილი თანხა 2 150 000 ლარს შეადგენს.
დღეს, 9 აგვისტოს, აჭარის ჯანდაცვის მინისტრის პირველი მოადგილე მარი ზანაქიძე ევექსის ბათუმის რეფერალურ საავადმყოფოში კლინიკის ხელმძღვანელებთან და ტრანსპლანტოლოგიის გუნდთან ერთად იმ პაციენტებს შეხვდა, რომლებმაც ღვიძლი აჭარაში გადაინერგეს. შეხვედრას დონორებიც ესწრებოდნენ.
შეხვედრას ესწრებოდა პაციენტი, რომელმაც ღვიძლის ტრანსპლანტაცია აჭარაში პირველმა, 2014 წელს ჩაიტარა.
„ტრანსპლანტაციიდან 9 წელი გავიდა, მიუხედავად იმისა, რომ ჩემი ჯანმრთელობის მდგომარეობა ძალიან მძიმე იყო და საკმაოდ რთული პერიოდი გავიარე, დღეს თითქმის აღარაფერი მახსოვს, ცხოვრებას ჩვეულ რეჟიმში ვაგრძელებ და პერიოდულად გეგმურ კვლევებს ვიტარებ,“- განაცხადა ტატიანა მეგრელიშვილმა.
აჭარის ჯანდაცვის სამინისტროს ცნობით, წელს ღვიძლის ტრანსპლანტაციის პროგრამით უკვე ორმა ბენეფიციარმა ისარგებლა.
ამავე თემაზე:
