ნეტგაზეთი • RU

საგზაო უსაფრთხოება მთავრობის პასუხისმგებლობაა – გაეროს ახალი რეზოლუცია

გაეროს წევრმა 193 ქვეყანამ გლობალური საგზაო უსაფრთხოების გაუმჯობესების შესახებ რეზოლუცია ერთხმად მიიღო. რეზოლუცია ავალდებულებს ქვეყნებს განახორციელონ საგზაო უსაფრთხოების სამოქმედო გეგმა, რომლის შედეგადაც 2030 წლისთვის მსოფლიოში 50%-ით უნდა შემცირდეს ავტოსაგზაო შემთხვევებით დაღუპულთა და დაშავებულთა რაოდენობა.

საქართველო გაეროს წევრ ქვეყნებს შორისაა. შს სამინისტროს ცნობით, გასულ წელს ქვეყანაში ავტოსაგზაო შემთხვევების შედეგად 449 ადამიანი დაიღუპა, 7705 კი დაშავდა.

ავტოსაგზაო შემთხვევები მსოფლიოს მასშტაბით ყოველწლიურად დაახლოებით 1,3 მილიონ ადამიანს კლავს – ეს ყოველ წუთში 2-ზე მეტი გარდაცვალებაა. ავტოსაგზაო შემთხვევათა 90%-ზე მეტი ხდება დაბალი და საშუალო შემოსავლის ქვეყნებში.

„საგზაო უსაფრთხოება ყველას ეხება. ჩვენ ყოველდღიურად გამოვდივართ ჩვენი სახლიდან გზებზე, რომელსაც მივყავართ სამსახურამდე, სკოლამდე და ჩვენი სასიცოცხლო ყოველდღიური მოთხოვნილებების დასაკმაყოფილებლად. თუმცა ჩვენი სატრანსპორტო სისტემები ძალიან საშიშია. არცერთი სიკვდილი არ უნდა იყოს მისაღები ჩვენს გზებზე” – თქვა ჯანმოს გენერალურმა დირექტორმა, ტედროს გებრეისუსმა.

გაეროს მიერ მიღებული დოკუმენტი ხაზს უსვამს საგზაო ინფრასტრუქტურის დიზაინის დაგეგმარების, ასევე, ავტომობილების უსაფრთხოების სტანდარტებისა და კანონმდებლობის დახვეწის მნიშვნელოვნებას, როგორც ავარიებით გამოწვეული სიკვდილისა და დაზიანებების თავიდან აცილების ძირითად გზებს. გარდა ამისა, დოკუმენტის თანახმად ხელი უნდა შეეწყოს ფეხით, ველოსიპედითა და საზოგადოებრივი ტრანსპორტით უსაფრთხო სიარულს.

ჯანმოს ოფიციალური მონაცემებით, ავტომობილის გამოგონების შემდეგ 50 მილიონზე მეტი ადამიანი დაიღუპა მსოფლიოს გზებზე.

გაეროს სესიაზე გაეროს გენერალურმა მდივანმა, ანტონიო გუტერეშმა განაცხადა, რომ ავტოსაგზაო შემთხვევები მჭიდროდ არის დაკავშირებული ცუდ ინფრასტრუქტურასთან, დაუგეგმავ ურბანიზაციასთან, სოციალური დაცვისა და ჯანდაცვის სუსტ სისტემებთან და სოციალურ უთანასწორობასთან.

შეხვედრაზე ასევე ითქვა, რომ საგზაო უსაფრთხოება წარმოადგენს განვითარების გადაუდებელი პრიორიტეტს და საზოგადოებრივი ჯანმრთელობის ერთ-ერთ ძირითად პრობლემას დაბალი და საშუალო შემოსავლის მქონე ქვეყნებში, სადაც ავტოსაგზაო შემთხვევებში დაღუპვისა და დაშავების შემთხვევების 90 პროცენტზე მეტი ხდება, მზარდი მოძრაობის, ინფრასტრუქტურის სწრაფი გაფართოებისა და არაერთგვაროვანი მოძრაობის შედეგად.

  • საჭიროა უსაფრთხო ურბანული და საგზაო ინფრასტრუქტურის პროექტირება და ინჟინერია;
  • უნდა დაწესდეს უსაფრთხო, ადეკვატური სიჩქარის ლიმიტები, რომლებიც გაკონტროლდება სიჩქარის მართვის შესაბამისი ზომებით;
  • სადაც შესაძლებელია, შეიქმნას მოტორიზებული და არამოტორიზებული ტრანსპორტის ოპტიმალური ნაზავი, განსაკუთრებული აქცენტით საზოგადოებრივ ტრანსპორტზე, ფეხით და ველოსიპედით გადაადგილებაზე, ველოსიპედის გაზიარების სერვისების ჩათვლით, უსაფრთხო საცალფეხო ინფრასტრუქტურა და რკინიგზაზე გადასასვლელები, განსაკუთრებით ქალაქებში.

დოკუმენტის თანახმად, საგზაო უსაფრთხოება უპირველეს ყოვლისა მთავრობების პასუხისმგებლობაა, ამასთანავე, პასუხისმგებლობა ეკისრება  საჯარო და კერძო სექტორს, პროფესიულ და არასამთავრობო ორგანიზაციებს, მოქალაქეებსა და მედიას.

ფოტოზე: ავარია ბათუმში. ფოტო „ბათუმელების“ არქივიდან. 

ამავე თემაზე:

449 დაღუპული, 7 707 დაშავებული და არც ერთი „შავი წერტილი“ გზებზე – ავარიები

მტვერში გახვეული სამრეწველო ბათუმი და სიცოცხლისთვის საშიში გზაჯვარედინი | VIDEO

სახიფათო ადგილები ბათუმი-ახალციხის მაგისტრალზე [ფოტო]

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან