უკრაინის პრეზიდენტის მრჩეველი, მიხაილო პოდოლიაკი, სირიაში რუსეთის დროშის ქვეშ მცურავი კიდევ ერთი გემის მიერ სავარაუდოდ უკრაინიდან მოპარული ხორბლის ჩატანას გამოეხმაურა.
პოდოლიაკის თქმით, ყოველი მეზღვაური, ვინც მონაწილეობს მსგავს ქმედებებში, ძებნილთა საერთაშორისო სიაში მოხვდება და მათ ინტერპოლი დააპატიმრებს.
„რუსეთი აგრძელებს სისხლიანი უკრაინული ხორბლის ექსპორტს სირიაში. ყოველი მეზღვაური, რომელიც მონაწილეობს რუსულ დანაშაულებრივ სქემაში და ყიდის დანაშაულებრივად მითვისებულ ქონებას, იქნება იდენტიფიცირებული და მოხვდება საერთაშორისო ძებნილთა სიაში. მძარცველებს მსოფლიოს ყველა პორტში დაპატიმრების ორდერით დაელოდება ინტერპოლი,“ – წერს უკრაინის პრეზიდენტის მრჩეველი.
🇷🇺 continues to export bloody 🇺🇦 grain to Syria. Every seafarer participating in 🇷🇺 scheme & selling criminally acquired property will be identified and put on the international wanted list. In each port of the world, the Interpol will wait for the looters with an arrest warrant.
— Михайло Подоляк (@Podolyak_M) May 30, 2022
CNN-ის ინფორმაციით, სავარაუდოდ, რუსების მიერ უკრაინაში მოპარული ხორბლით დატვირთული რუსეთის დროშის ქვეშ მცურავი ერთ-ერთი გადამზიდი გემი – „მატროსი პოზინიჩი“ სირიის ქალაქ ლატაკიაში შევიდა. როგორც გამოცემა წერს, ეს ამ გემის მეორე მოგზაურობაა ბოლო ოთხი კვირის განმავლობაში. ერთჯერადად გემს დაახლოებით 30 000 მეტრული ტონა ტვირთის გადატანა შეუძლია.
უკრაინის მთავრობის წარმომადგენლების განცხადებით, ომის დაწყების შემდეგ რუსებმა უკრაინიდან 400 000 ტონა ხორბალი მოიპარეს და გაიტანეს.
რუსეთი ბლოკავს უკრაინის პორტებს, რომელთა მეშვეობითაც უკრაინული ხორბალი შავი ზღვის გავლით გადის ექსპორტზე. უკრაინა ხორბლის მეხუთე, ხოლო სიმინდის მეოთხე – უდიდესი ექსპორტიორია მსოფლიოში. რუსეთიდან და უკრაინიდან გადატანილი ხორბალი კი, გლობალური ბაზრის 30%-ს შეადგენდა ომამდე.
აღნიშნული გარემოებები უკვე გახდა სურსათის გლობალური კრიზისის შიშის საფუძველი საერთაშორისო საზოგადოებისთვის.
__________________
ამავე თემაზე წაიკითხეთ:
ყირიმის პორტში რუსული გემები უკრაინიდან მოპარული ხორბლით დაიტვირთა – CNN
