ქობულეთში, სოფელ ცეცხლაურში, აშენებულ ახალ ნაგავსაყართან მისასვლელი გზის მიერთების მოსაწყობად, აჭარის ნარჩენების მართვის კომპანიამ ტენდერი 2 310 553 ლარით გამოაცხადა. სამუშაოების შესასრულებლად საჭირო თანხა აჭარის ბიუჯეტიდან დაიხარჯება.
პროექტით, ერთმანეთს უნდა მიუერთდეს ქობულეთის შემოვლითი გზა [ავტობანი] და ნაგავსაყართან მისასვლელი გზის ის მონაკვეთი, რომელიც უკვე აშენებულია.
„სამშენებლო მონაკვეთი იწყება ქობულეთის შემოსავლელი გზის მე-10 კმ-ში, მოწყობილი ამაჩქარებელ-შემანელებელი ზოლების მეშვეობით გადადის საავტომობილო გზიდან და მთავრდება სოფელ ცეცხლაურთან 2014 წელს დაპროექტებული გზის მიერთებაზე. სამშენებლო მონაკვეთის სიგრძეა 0.96 კმ.“ – აღნიშნულია პროექტში.
ტენდერის პირობის მიხედვით, „მიმწოდებელმა უნდა უზრუნველყოს ავტობანზე არსებული 12 ცალი განათების ბოძის და ბეტონის ფუნდამენტის დემონტაჟისა და შემდგომში მონტაჟისათვის საჭირო ყველა ნებართვების მოპოვება უფლებამოსილი ორგანოებისაგან. ასევე დროებითი მოძრაობის სქემის შეთანხმება.“
ტენდერში წინადადებების მიღება 2022 წლის 5 მარტს დაიწყება და 10 მარტს დასრულდება.
სამუშაოს შესრულების ვადა კი, ხელშეკრულების გაფორმებიდან 90 კალენდარული დღეა.
ცეცხლაურის ახალ ნაგავსაყართან მისასვლელი გზა / ფოტო: აჭარის ნარჩენების მართვის კომპანია
ბათუმის ახალი ნაგავსაყარის მშენებლობა ქობულეთის სოფელ ცეცხლაურთან დასრულებულია და ნარჩენების მიღება 2022 წლის ივნისში უნდა დაიწყოს.
ამ თემაზე ვრცლად:
როგორ იმუშავებს ახალი ნაგავსაყარი და რა ელის ძველს – ნარჩენების მართვა აჭარაში
ბათუმის ახალი ნაგავსაყარის პროექტზე რამდენიმე წელია მიმდინარეობს მუშაობა. ბოლო ინფორმაციით მშენებლობა გასულ, 2020 წელს უნდა დასრულებულიყო:
თუმცა, გადავადების მიზეზად, ძირითადად პანდემია დასახელდა.
მთავარი ფოტო: ქობულეთი და ქობულეთის შემოვლითი გზა / ხედი ცეცხლაურის ნაგავსაყარიდან / 3.12.2019
