ქობულეთში, სოფელ ალამბარში მდებარე სასათბურე მეურნეობას აჭარის მთავრობა პირობებით აუქციონზე ყიდის. აუქციონი აჭარის ფინანსთა და ეკონომიკის სამინისტრომ გამოაცხადა.
ქონების საწყისი გასაყიდი ფასია 2 270 000 ლარი, ვაჭრობის ბიჯი – 45 000 ლარი. 567 500 ლარი კი საგარანტიო თანხაა.
სასათბურე მეურნეობის მრავალწლიანი იჯარით გაცემა აჭარის მთავრობამ რამდენჯერმე სცადა, თუმცა უშედეგოდ. ამჯერად კი, ერთ ლოტად, პირობებით იყიდება შემდეგი ქონება:
- ჯამში 62 220 კვადრატული მეტრი სასოფლო-სამეურნეო დანიშნულების მიწა;
- სათბურები, საერთო ფართობით 22 768,56 კვადრატული მეტრი
ელექტრონული აუქციონი დაწყებულია და ის 2022 წლის პირველ მარტს დასრულდება.
რაც შეეხება აუქციონის პირობას:
- ქონების მყიდველი ვალდებულია ნასყიდობის ხელშეკრულების გაფორმებიდან არაუმეტეს 3 თვის ვადაში, აამოქმედოს არსებული სათბურები და აგროპარკი, ამასთან, აგროპარკის არსებული ინფრასტრუქტურა შეინარჩუნოს 2023 წლის დეკემბრამდე. ამ პერიოდში დასაქმებულთა არანაკლებ 80% უნდა იყოს საქართველოს მოქალაქე;
- მყიდველი ასევე ვალდებულია საკუთრებაში გადაცემულ ქონებაზე 20 წლის ვადით შეინარჩუნოს დასაქმებულთა თანაფარდობა და სასოფლო-სამეურნეო პროფილი. მას უფლება ექნება, აუქციონზე შეძენილ მიწის ნაკვეთზე განათავსოს სოფლის მეურნეობის პროდუქციის წარმოებისათვის [გადამუშავება, დაფასოება, შეფუთვა, შენახვა და ა.შ] საჭირო სხვა ნაგებობებიც.
- მყიდველმა, ნასყიდობის ხელშეკრულების გაფორმებიდან 2 წლის ვადაში საკუთრებაში გადაცემულ უძრავ ქონებაზე არანაკლებ 500 000 ლარის ინვესტიცია უნდა განახორციელოს.
აუქციონში აღნიშნულია, რომ საქართველოს კანონმდებლობის თანახმად, სასოფლო-სამეურნეო დანიშნულების მიწის ნაკვეთის შემძენი არ შეიძლება იყოს:
- უცხოელი [ფიზიკური პირი, რომელიც არ არის საქართველოს მოქალაქე, ასევე, საქართველოში სტატუსის მქონე მოქალაქეობის არმქონე პირი];
- იურიდიული პირი, რომლის დომინანტი პარტნიორია უცხოელი ან/და საზღვარგარეთ რეგისტრირებული იურიდიული პირი ან რომლის დომინანტი პარტნიორი ვერ დგინდება.
სასათბურე მეურნეობის 2046 წლამდე სარგებლობაში გადაცემაზე აუქციონი ბოლოს „აგროსერვისცენტრს“ ჰქონდა გამოცხადებული. აუქციონის საწყისი ფასი 188 240 ლარით, ხოლო წლიური საწყისი სარგებლობის საფასური 141 180 ლარით იყო განსაზღვრული.
ეს აუქციონი 2021 წლის 25 იანვარს უნდა დასრულებულიყო მაგრამ „აგროსერვისცენტრმა“ იგი შეწყვიტა.
ამავე თემაზე:
აჭარის მთავრობამ 160 ტონა ბოსტნეული მოიყვანა, სათბურებს კი 25 წლით ასხვისებს
