ბათუმში, დრამატული თეატრის მცირე სცენაზე, 30 და 31 მაისს, 18:40 საათზე, ბათუმის პირველი საჯარო სკოლის თეატრალური დასი „სარკე“ საქველმოქმედო სპექტაკლს წარმოადგენს.
სპექტაკლი, სახელწოდებით -„ევამიანი“ ასახავს ქალთა ძალადობასთან დაკავშირებულ პრობლემებს.
„სპექტაკლის საშუალებით დამსწრე საზოგადოებას ეძლევა საშუალება, გაანალიზოს ის სიტუაციები, რომლებშიც ძალადობის მსხვერპლნი ხვდებიან და აღიქვან ის შესაძლებლობები, რომლებიც სიტუაციას გამოასწორებს.
პროექტი კონცენტრირებულია ქალთა ძალის წარმოჩენაზე, 5 სხვადასხვა სიტუაციისა და დროის პარადოქსის გამოყენებით, რაც მაყურებელს ეხმარება პრობლემის სიმძიმის უკეთ აღქმასა და ანალიზში“ – აღნიშნულია პრესრელიზში.
სპექტაკლის რეჟისორი და ინსცენირების ავტორია დიანა ჩახუნაშვილი. სპექტაკლზე მოხალისეობრივად მუშაობენ რეჟისორი, მხატვარი, ქორეოგრაფი და დასი, ყოველგვარი ანაზღაურების გარეშე, ბათუმის სსიპ ილია ჭავჭავაძის სახელობის #1 საჯარო სკოლის მხარდაჭერით.
სპექტაკლზე დასწრება შეზღუდულია 14 წლამდე ასაკის მოზარდებისთვის. ბათუმის დრამატული თეატრის მცირე სცენის მისამართია: ახმედ მელაშვილის 32.
ბილეთები შეგიძლიათ შეიძინოთ ამ ბმულზე.
გაყიდული ბილეთებიდან შემოსული თანხა ქალთა სერვისცენტრებში გადაირიცხება.
სპექტაკლი დაიდგა USAID-ის პროგრამის – „ერთიანობა მრავალფეროვნებაშია“ ფარგლებში, რომელსაც საქართველოს გაეროს ასოციაცია აშშ-ის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით ახორციელებს.
აჭარაში პროგრამის პარტნიორია „თავისუფალ ჟურნალისტთა სახლი“.
