საქართველოს ჯანდაცვის მინისტრის ეკატერინე ტიკარაძის განცხადებით, თბილისში საველე ჰოსპიტალი 500 საწოლზე გაიშლება.
„საწოლების უმეტესი ნაწილი იქნება ჟანგბადით აღჭურვილი. დღესდღეობით ინვენტარი და ყველა ის მოწყობილობა, რომელიც ესაჭიროება საწოლებს, რომ ჟანგბადით მომარაგდეს, გამართულია.
დამონტაჟებულია 2 ხუთტონიანი ცისტერნა, რომელიც მოამარაგებს ამ საწოლებს ჟანგბადით,” – თქვა ჯანდაცვის მინისტრმა.
ჯანდაცვის მინისტრის თქმით, საველე ჰოსპიტლის მუშაობაში არ იგეგმება იმ სამხედრო ექიმების ჩართვა, რომლებსაც აქვთ სამხედრო წოდება.
„უნდა აღინიშნოს, რომ გეგმას არ წარმოადგენს მათი გამოყვანა და საველე ჰოსპიტალში მუშაობა, ვინაიდან ამისათვის განხორციელებულია უკვე დამატებითი სამუშაო და სხვა ექიმთა ჯგუფი მიიღებს პაციენტებს, რომლებიც მათი საკმარისი კვალიფიკაციით პაციენტებს გაუწევენ შესაბამის მომსახურებას.
ასევე მნიშვნელოვანია, რომ გვაქვს კომუნიკაცია წითელ ჯვართან, რომელსაც აქვს საკმაოდ კარგი გამოცდილება როგორც მოხალისეების კუთხით, ასევე მათ მუდმივ თანამშრომლებთან ერთად და მათთან ერთად პაციენტები მიიღებენ იმ მომსახურებას, რომელიც მათ ესაჭიროებათ.
ჯანდაცვის სამინისტრო გააკეთებს ყველაფერს, რომ საველე ჰოსპიტალი იყოს ყველაზე უკიდურეს შემთხვევაში გამოყენებული. ჩვენ მაქსიმალურად ვეცდებით, პაციენტების და ექიმების ინტერესებიდან, მათი კომფორტიდან და უსაფრთხოებიდან გამომდინარე, კოვიდის მართვა დარჩეს ჰოსპიტალურ სექტორში და არ გახდეს საჭირო საველე ჰოსპიტლების გამოყენება.
საველე ჰოსპიტალი – ეს არის ყველაზე უკიდურესი გეგმა, რომლისთვისაც საქართველო უკვე მზად არის,” – განაცხადა ეკატერინე ტიკარაძემ.
