ამ წუთებში, თბილისში მე-11 პავილიონში ყოფილი პრემიერ-მინისტრის გიორგი გახარიას პარტიის პრეზენტაცია მიმდინარეობს. გამოსვლისას გიორგი გახარიამ ქვეყნის პოლიტიკურ კურსზე ისაუბრა.
„ჩვენ გვჭირდება ისეთ საკითხებზე საყოველთაო პოლიტიკური შეთანხმება, ყველა პოლიტიკური ძალის, ყველა პოლიტიკური პარტიის, ისეთ ზეპარტიულ საკითხებზე მაინც, რომელზეც ჩვენი მოქალაქეები დიდი ხანია უკვე შეთანხმდნენ.
მაგალითად გაურკვეველია, რაზე უნდა იდაონ პოლიტიკურმა პარტიებმა, პოლიტიკურმა ჯგუფებმა როდესაც რუსულ ოკუპაციაზე ვსაუბრობთ. რაზე უნდა იდაონ პოლიტიკურა პარტიებმა ან პოლიტიკურმა ძალებმა, როდესაც ვსაუბრობთ ქვეყნის ევროპულ, ან ევროატლანტიკურ მომავალზე. საბოლოოდ ჯამში, რაზე დაობს ეს ხალხი, მაშინ როცა ჩვენ მოქალაქეებმა დიდი ხანია გადაწყვიტეს ქვეყნის მშვიდობიანი და არა ძალადობრივი განვითარება“-განაცხადა გახარიამ პარტიის პრეზენტაციაზე.
მან გამოსვლისას ქუჩის აქციებზეც გააკეთა აქცენტი.
„ზოგიერთი პოლიტიკური ძალა დაბეჯითებით მოუწოდებს ჩვენს მოქალაქეებს ქუჩაში გამოსვლისკენ და ქუჩის საშუალებით, ქვეყანაში რეალური პოლიტიკის შეცვლისკენ, მაშინ როდესაც არავის არაფერი არ გამოსდის. მაშინ როცა პანდემიის პირობებში ჩვენი 2 მილიონი მოქალაქე მივიდა არჩევნებზე და ხმა მისცა ქვეყანაში დემოკრატიულ პროცესს, ეს აჩვენებს, რომ ჩვენი მოქალაქეების პოლიტიკური კულტურა ბევრად უფრო მაღალია ვიდრე ჩვენი პოლიტიკური კლასის“-ამბობს გახარია.
მისი თქმით, პოლიტიკური ძალები უნდა გაერთიანდნენ იმისთვის, რომ საქართველოს მოქალაეებს მიეცეთ შესაძლებლობა ძლიერ ქვეყანაში ცხოვრების.
