ტაქსით გადაადგილება უკვე 3 მგზავრსაც შეუძლია – დადგენილება

24 მარტიდან ტაქსით გადაადგილება 3 მგზავრსაც შეუძლია. შესაბამისი დადგენილება მთავრობამ 23 მარტს მიიღო. ამ დრომდე ტაქსით გადაადგილება მაქსიმუმ 2 მგზავრს შეეძლო. ამასთან, მძღოლისთვის და მგზავრებისთვისაც სავალდებულოა პირბადის ტარება.

იზოლაციისა და კარანტინის წესებში 23 მარტამდე შესაბამისი მუხლი შემდეგნაირად იყო ჩამოყალიბებული:

„იკრძალება ტაქსით (M1 კატეგორია) გადაადგილებით მომსახურებისას 3-ზე მეტი პირის (მძღოლის ჩათვლით) გადაადგილება. ამასთან, მძღოლი აღჭურვილი უნდა იყოს პირბადით და მგზავრები უნდა განთავსდნენ მძღოლის უკანა მხარეს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ გაცემული რეკომენდაციების შესაბამისად“.

მთავრობის 2021 წლის 23 მარტის დადგენილებაში კი, რომელიც იმავე დღეს ამოქმედდა, ეს მუხლი შემდეგნაირადაა ჩამოყალიბებული:

„ტაქსით (M1 კატეგორია) გადაადგილებით მომსახურებისას როგორც მძღოლი, ისე მგზავრები აღჭურვილი უნდა იყვნენ პირბადით.“

კვლავ ძალაში რჩება საჯარო სივრცეში პირბადის ტარება:

„საჯარო სივრცეში თავშეყრისას ყველა პირი ვალდებულია, ატაროს პირბადე. ამ მუხლის მიზნებისთვის საჯარო სივრცე არის როგორც ჭერქვეშ, ისე გარეთ არსებული ნებისმიერი ადგილი, თუ იგი არ წარმოადგენს კერძო პირთა საცხოვრებელი მიზნებისთვის გამოსაყენებელ ადგილს. პირბადის ტარებისგან გათავისუფლების შემთხვევები განისაზღვრება „პირბადის ტარების წესის დამტკიცების შესახებ“ საქართველოს მთავრობის 2020 წლის 15 ივნისის №368 დადგენილებით.“

ძალაში რჩება ასევე კომენდანტის საათი. იზოლაციისა და კარანტინის წესების მიხედვით:

„საცხოვრებელ ადგილზე მოსახლეობის დარჩენის უზრუნველსაყოფად, ქვეყნის მთელ ტერიტორიაზე იკრძალება 21:00 საათიდან 05:00 საათამდე პირთა გადაადგილება როგორც ქვეითად, ისე სატრანსპორტო საშუალებით, ასევე საჯარო სივრცეში ყოფნა“.