პირველ მაისს, მშრომელთა საერთაშორისო დღეს, ტაქსის მძღოლები მათი შრომითი უფლებების დაცვის მიზნით მსვლელობას გეგმავენ.
„მძიმე სოციალური და ეკონომიური მდგომარეობის გამო საქართველოს დიდ ქალაქებში – ბათუმში, ქუთაისსა და თბილისში, ტაქსის მძღოლები პროტესტის ნიშნად დილის 09:00 საათიდან აპლიკაციას გათიშავენ, ხოლო შემდგომ მსვლელობას მოაწყობენ საქართველოს დიდ ქალაქებში.
მსვლელობა დაიწყება 15:00 საათიდან.
ამავე დროს, 12:00 საათზე თბილისში შეიკრიბებიან კურიერებიც, მძიმე შრომითი და სოციალური მდგომარეობის გასაპროტესტებლად და შეუერთდებიან ტაქსის მძღოლებს.
ამავე დღეს, პირველ მაისს, „გურია ექსპრესში“ გაიფიცებიან დასაქმებულები. დაგეგმილია დამოუკიდებელი და თავისუფალი პროფესიული კავშირების კონფედერაციის დაფუძნება.
პირველი მაისი შრომის საერთაშორისო დღეა და ამ დღეს მთელ მსოფლიოში დასაქმებულები გამოდიან საკუთარ ქალაქებში და ღირსეული შრომის უფლებას ითხოვენ. პირველი მაისის მნიშვნელობა საბჭოთა კავშირის ხელისუფლებამ დაამახინჯა, შემდგომმა საქართველოს ხელისუფლებებმა საერთოდ გააუფასურეს. ყვითელმა პროფკავშირებმა, პროფკავშირებს დაუკარგეს არსი, მნიშვნელობა და ნდობა.
სწორედ ამიტომ, დროა დამოუკიდებელი, ძლიერი მშრომელთა გაერთიანებები შეიქმნას, რომ დავიწყოთ ბრძოლა იმ სოციალური უსამართლობის წინააღმდეგ, რაც ამ ქვეყანაში დროთა განმავლობაში უფრო მეტად მწვავდება.
ჩვენ გვაქვს იმის შესაძლებლობა, რესურსი და უნარები, რომ პირველ მაისს და მშრომელთა მოძრაობებს დავუბრუნოთ თავისი მნიშვნელობა“- ნათქვამია დამოუკიდებელი პროფესიული კავშირის, „ლაბორის“ განცხადებაში.
ბათუმში კერძო კომპანიაში დასაქმებულმა ტაქსის მძღოლებმა უკვე სამჯერ გამართეს საპროტესტო აქცია. ისინი შრომის პირობების გაუმჯობესებას და ასევე ტარიფების გაზრდას მოითხოვდნენ.
თუმცა, როგორც მძღოლები აცხადებდნენ, ამ დრომდე დამსაქმებლების მხრიდან არ ყოფილა შესაბამისი რეაგირება მათ მოთხოვნებზე, ამიტომ, მათივე თქმით, ისინი გააგრძელებენ საკუთარი შრომითი უფლებების დაცვას.
______________________
მთავარ ფოტოზე: ტაქსის მძღოლების საპროტესტო მსვლელობა ბათუმში, 2026 წლის აპრილი.
