მთავრობა ჭოროხისპირას მიწებს პირობებიან აუქციონზე ყიდის

აჭარის ფინანსთა და ეკონომიკის სამინისტრო ბათუმში, მდინარე ჭოროხისპირას, ამჯერად მიწის ორ ნაკვეთს ყიდის. ნაკვეთებზე ცალ-ცალკე აუქციონია გამოცხადებული.

ჭოროხის ქუჩის მიმდებარედ 8 491 კვ.მ მიწის საწყისი გასაყიდი ფასი 1 მილიონი ლარია, ხოლო მეორე ნაკვეთი, რომელიც იქვე ახლოს, კახაბრის დასახლებაში მდებარეობს, 4 409 კვ.მ-ია და 470 ათას ლარად იყიდება. ვაჭრობის ბიჯი შესაბამისად, 25 ათასი და 10 ათასი ლარია.

პირველ ნაკვეთზე მომავალმა მესაკუთრემ ბათუმის საკრებულოს მიერ დადგენილი „სამრეწველო ზონა 1“-ის შესაბამისი საწარმოს [წარმოების ხაზი, დახურული ტიპის სასაწყობე მეურნეობა, გარდა ინერტული მასალების წარმოებისა] მშენებლობის ნებართვა უნდა მიიღოს, ხელშეკრულების გაფორმებიდან 12 თვეში, ხოლო 42 თვის ვადაში, ნაგებობა ექსპლუატაციაში უნდა გაუშვას. ამ ყველაფერში კი, არანაკლებ 1 მილიონი ლარის ინვესტიცია უნდა ჩადოს.

რაც შეეხება მეორე ნაკვეთს – მომავალ მესაკუთრეს იგივე ვალდებულება ექნება, ოღონდ ნებართვა 9 თვეში უნდა მიიღოს, შენობა ექსპლუატაციაში 36 თვეში გაუშვას და არანაკლებ 300 ათასი ლარის ინვესტიცია ჩადოს.

ქონების შემსყიდველებს ასევე ევალებათ, სამომავლოდ საწარმოებში დასაქმებულთა არანაკლებ 90% იყოს საქართველოს მოქალაქე; დასაქმებულთა თანაფარდობისა და საწარმოს პროფილის შენარჩუნება კი ობიექტის ამოქმედებიდან არანაკლებ 15 წლის განმავლობაში.

აუქციონზე გატანილი მიწის ნაკვეთები [აღნიშნულია ყვითელი ფერით]

ამ ტერიტორიაზე, სადაც ეს ნაკვეთები იყიდება, გზებს ბათუმის მერია მოაწყობს. აჭარის მთავრობის ინფორმაციით, აღნიშნული გზების მოწყობის მიზანი სამრეწველო ზონის განვითარებაა.

გზების მშენებლობაზე ტენდერი მერიას 18 მილიონი ლარით ჰქონდა გამოცხადებული. სამუშაოების შესრულებას კი, შპს New Road 13 588 888 ლარად სთავაზობს. მერიის ეს ტენდერი 12 მარტის მდგომარეობით, შერჩევა-შეფასების ეტაპზეა.

ამ თემაზე: