Batumelebi | პროდუქციაზე უსაფრთხოების მოთხოვნით პეტიცია ვრცელდება პროდუქციაზე უსაფრთხოების მოთხოვნით პეტიცია ვრცელდება – Batumelebi
RU | GE  

პროდუქციაზე უსაფრთხოების მოთხოვნით პეტიცია ვრცელდება

სამომხმარებლო პროდუქციის უსაფრთხოების მოთხოვნით, პეტიცია ვრცელდება. ინფორმაცია momxmarebeli.ge-ის ვებგვერდზეა განთავსებული.

ორგანიზაციის განცხადებით, საქართველოში სამომხმარებლო ნაწარმის აბსოლუტური უმრავლესობის უსაფრთხოების მოთხოვნები დადგენილი არ არის და არ მოქმედებს სახელმწიფო კონტროლი.

„უსაფრთხოების კონტროლს მიღმაა დარჩენილი ისეთი ყოველდღიური მოხმარების ნაწარმი, როგორებიცაა ჰიგიენის საშუალებები, ჭურჭელი, ტექსტილი, ფეხსაცმელი, კოსმეტიკა, ავეჯი და სხვა. საქართველოს მოქალაქეების, მათ შორის, მომავალი თაობების სიცოცხლე და ჯანმრთელობა დაცული არ არის“, – ნათქვამია განცხადებაში.

„მოვითხოვთ, საქართველოს პარლამენტმა რაც შეიძლება მოკლე ვადებში უზრუნველყოს ყველა სახის სამომხმარებლო პროდუქციის უსაფრთხოების მოთხოვნების დადგენა და უსაფრთხოების სახელმწიფო კონტროლის დაწესება, ევროკავშირის მოდელის ანალოგიურად“, – ნათქვამია პეტიციაში.

ტექსტში ასევე ვკითხულობთ: „მართალია, საქართველოს ხელისუფლებას გააჩნია გარკვეული გეგმები მოცემული პრობლემის მოსაგვარებლად, მაგრამ მათი განხორციელება ძალზე ნელი ტემპებით მიმდინარეობს და შედეგების პროგნოზირება რთულია. ამასთანავე, ეს გეგმები არ გულისხმობს ყველა სახის სამომხმარებლო პროდუქციის კონტროლს“.

ხელმოწერების მიღების ბოლო ვადაა 2021 წლის 21 თებერვალი.

როგორც momxmarebeli.ge წერს, მინიმუმ 300 ხელმოწერის დაფიქსირების შემთხვევაში, პარლამენტი ვალდებული იქნება პეტიცია განიხილოს.

განცხადებაში ასევე ნათქვამია, რომ სამომხმარებლო პროდუქციისგან შეიძლება მომდინარეობდეს ფიზიკური, ელექტრული, ბიოლოგიური, ქიმიური და რადიოაქტიური საფრთხეები. „ამ პროდუქტებმა შეიძლება არა მხოლოდ ერთბაშად დააზიანოს ადამიანი, არამედ თანდათანობით, სისტემატური მოხმარების დროს იმოქმედოს ჯანმრთელობაზე და ისეთი სერიოზული დაავადებები გამოიწვიოს, როგორებიცაა სიმსივნე და გენების გადაგვარება, ენდოკრინული და რეპროდუქციული სისტემების დაზიანება და სხვა“.

სამომხმარებლო პროდუქციის უსაფრთხოების სახელმწიფო კონტროლი მსოფლიო ბევრ ქვეყანაშია დანერგილი, მათ შორის ევროკავშირში. ევროკავშირის ქვეყნების მაკონტროლებელი ორგანოების მიერ გამოვლენილი საფრთხის შემცველი არასასურსათო პროდუქტების შესახებ ინფორმაცია სისტემატურად თავსდება ევროკომისიის ოფიციალურ საიტზე „საფრთხის შემცველი არასასურსათო პროდუქტების სწრაფი განგაშის სისტემა“.

საქართველოს ბაზრიდან აღებული ზოგიერთი პროდუქციის შემოწმების შედეგები კი განთავსებულია საიტზე momxmarebeli.ge.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com