ცენტრალური საარჩევნო კომისიის წინასწარი მონაცემების შედეგად ბათუმის #28 მაჟორიტარულ ოლქში არჩევნების მეორე ტურში რესან კონცელიძემ გაიმარჯვა.
ამ დროისთვის ბათუმის #28 მაჟორიტარულ ოლქში დათვლილია უბნების 40 პროცენტი, სულ 49 უბანი.
ამ მონაცემების მიხედვით კონცელიძემ ამომრჩეველთა ხმების 88.47% მიიღო, სულ 9 465 ხმა.
ამავე ოლქში საარჩევნო ბიულეტენში იყო ლევან ვარშალომიძეც, რომელმაც თავის ამომრჩევლებს არჩევნების ბოიკოტისკენ მოუწოდა. ოპოზიციის ბოიკოტის მიუხედავად ლევან ვარშალომიძეს, 49 უბნის მონაცემებით, ხმა მისცა 1234 ამომრჩეველმა – 11.53%-მა.
პირველ ტურში, 31 ოქტომბერს, ლევან ვარშალომიძესა და რესან კონცელიძეს შორის სხვაობა სამი პროცენტი იყო, ვარშალომიძემ 31 ოქტომბერს ბათუმის ოლქში ხმათა 37,3% მიიღო, კონცელიძემ კი – 40,97%.
ხმათა 88 პროცენტზე მეტი აქვს „ოცნების“ კანდიდატს, ანზორ ბოლქვაძეს #30 მაჟორიტარული ოლქიდან.
ამ ოლქის 180-დან 94 უბნის მონაცემებით, ანზორ ბოლქვაძემ მეორე ტურში ხმათა 88.73% მიიღო, 16770 ხმა.
ამავე ოლქში, 94 უბნის მონაცემებით, მიშა ბოლქვაძეს „ერთიანი ნაციონალური მოძრაობიდან“ 2129 ამომრჩეველმა, 11.27%-მა მისცა ხმა.
დღეს, 21 ნოემბერს, საქართველოში საპარლამენტო და აჭარის უმაღლესი საბჭოს არჩევნების მეორე ტური ოპოზიციური პარტიების ბოიკოტის ფონზე გაიმართა.
ოპოზიციური პარტიები არ ცნობენ 31 ოქტომბერს გამართული არჩევნების შედეგებს. ისინი აცხადებენ, რომ არჩევნები ხელისუფლებამ გააყალბა და არ აპირებენ შესვლას საქართველოს პარლამენტსა და აჭარის უმაღლეს საბჭოში.
განახლებული ინფორმაცია: ყველა საარჩევნო უბნის დათვლის შედეგად, ცესკოს წინასწარი მონაცემებით, რესან კონცელიძემ ბათუმის ოლქში 87,81 პროცენტი მიიიღო [30057 ხმა], ხოლო ანზორ ბოლქვაძემ #30 მაჟორიტარულ ოლქში – 88,19 პროცენტი [32062 ხმა].
https://netgazeti.ge/news/500431/
