Batumelebi | აჭარის ორი სოფლის ბოიკოტი – წაბლანა და წაბლიანი არჩევნებზე ისევ არ მიდის აჭარის ორი სოფლის ბოიკოტი – წაბლანა და წაბლიანი არჩევნებზე ისევ არ მიდის – Batumelebi
RU | GE  

აჭარის ორი სოფლის ბოიკოტი – წაბლანა და წაბლიანი არჩევნებზე ისევ არ მიდის

დღეს, 21 ნოემბერს საქართველოში საპარლამენტო და აჭარის უმაღლესი საბჭოს არჩევნების მეორე ტური მიმდინარეობს.

ხულოში, სოფელ წაბლანას და წაბლიანის მოსახლეობა პროტესტის ნიშნად კვლავ არ მიდის არჩევნებზე.

ამ ორ სოფელში ამომრჩევლებმა არც პირველ ტურში არ მიიღეს მონაწილეობა.

როგორც სოფელ წაბლანას კომისიის თავმჯდომარემ ბიჭიკო შანთაძემ უთხრა „ბათუმელებს“, დღეს საარჩევნო უბანზე არც ერთი ამომრჩეველი არ მისულა. წაბლანაში 600 ამომრჩეველია.

„მხოლოდ კომისიის წევრებმა მივეცით ხმა. ჯერ ერთი ამომრჩეველიც არ მოსულა უბანზე“ – ამბობს კომისიის თავმჯდომარე. 

კონსტიტუციური უფლების გამოყენებაზე უარი თქვეს წაბლანას მეზობელ სოფელში,  წაბლიანში მცხოვრებმა ადამიანებმაც, სადაც 300 ამომრჩეველია. აქ საარჩევნო უბანი პირველ ტურშიც ცარიელი იყო და მეორე ტურშიც იგივე მდგომარეობაა.

სოფლის მოსახლეობის პროტესტი ხელისუფლების გულგრილობას უკავშირდება. სოფელ წაბლანაში 1989 წელს მეწყერი ჩამოწვა და 19 ადამიანი იმსხვერპლა. მას შემდეგ ყველა ხელისუფლება ჰპირდებოდა წაბლანელებს, რომ მათთვის საცხოვრებლის უზრუნველყოფაზე იზრუნებდა.

სოფლის მცხოვრებლების თქმით, მთავრობამ  ეს პირობა ნაწილობრივ შეასრულა, რადგან ერთი კორპუსი, რომელიც ააშენა, არ გაარემონტა. მოსახლეობის თქმით, ხელისუფლება ვალდებულია კანონის შესაბამისად [ისე, როგორც დევნილების შემთხვევაში] მათთვის გადაცემული ბინებიც გაარემონტოს.

ამავე თემაზე: რა უნდა გააკეთოს აჭარის მთავრობამ წაბლანელებისთვის – EMC-ის რეკომენდაცია

წაბლანას მოსახლეობა მთავრობა აფრთხილებდა კიდეც, რომ არჩევნებს ბოიკოტს გამოუცხადებდნენ და უბანზე არცერთი ამომრჩეველი არ მივიდოდა.

ამავე თემაზე: სოფელ წაბლანას საარჩევნო კომისიის ოქმი, რომელიც ისტორიას დარჩება 

__________________
მთავარი ფოტო: სოფელი წაბლანა, 31 ოქტომბრის არჩევნებზე სოფლის მცხოვრებლები საარჩევნო უბნის ნაცვლად მოედანზე შეიკრიბნენ. 
ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com