„ქართული ოცნების“ მაჟორიტარობის კანდიდატმა აჭარის უმაღლეს საბჭოში, ტიტე აროშიძემ საარჩევნო კამპანია შეაჩერა, მის 8 წლის შვილს კორონავირუსი დაუდასტურდა. როგორც ტიტე აროშიძე „ბათუმელებთან“ ამბობს, ის რამდენიმე დღეა თვითიზოლაციაშია.
„დროებით შევაჩერე საარჩევნო კამპანია, რადგან ჩემს შვილს დაუდასტურდა კორონავირუსი. ანალიზის პასუხი მივიღეთ 6 დღის წინ და მაშინვე გადავედი თვითიზოლაციაში. ბავშვს სიცხე ჰქონდა 37 გრადუსი და ამიტომ გავუკეთეთ ტესტი“, – ამბობს ტიტე აროშიძე.
მისი თქმით, ინფიცირების წყარო სავარაუდოდ მეზობელია, რადგან ბავშვს ამ ოჯახთან ჰქონდა შეხება. „დაბადების დღე ჰქონდა მეზობლის ბავშვს და საჩუქარი მიუტანა. ამ ბავშვის დედას დაუდასტურდა კორონავირუსი და სავარაუდოდ, წყარო აქედან უნდა იყოს“, – ამბობს ტიტე აროშიძე.
საარჩევნო კამპანიის დროს ტიტე აროშიძეს არაერთ ადამიანთან ჰქონდა შეხება, თუმცა როგორც კანდიდატი ამბობს, ის კორონავირუსზე ხშირად იტარებდა ტესტს და ყველა პასუხი უარყოფითი იყო.
„3 დღეში ერთხელ ვიტარებდი ტესტირებას მეც და რესან კონცელიძეც [ბათუმის მაჟორიტარი დეპუტატობის კანდიდატი პარლამენტში]. გუშინაც უარყოფითი პასუხი მომივიდა და რომც დამიდასტურდეს, სახელობითი წრე ვიცი, ვისთანაც მქონდა საარჩევნო კამპანიის დროს შეხება“, – ამბობს აროშიძე.
მისი თქმით, თვითიზოლაციაში იმყოფება მისი ოჯახის ყველა წევრი და, ასევე ის ოჯახი, რომელსაც მისი რვა წლის შვილი ესტუმრა.
5 ოქტომბრის მონაცემებით, აჭარაში კორონავირუსის 416 ახალი შემთხვევა გამოვლინდა.
