პოეტმა გენრი დოლიძემ, გასული წლის ივნისის მოვლენების დროს, პარლამენტის წინ გამართული აქციების დარბევისას ექსპრომტად მიღებული გადაწყვეტილებით დაამახსოვრა თავი საზოგადოებას: ის ხალხისკენ მიმავალი სპეცრაზმის წინ გაწვა. მოგვიანებით კი სოციალურ ქსელში დაწერა: „სხვა ვერაფერი შევძელი“. ამ ფაქტის ამსახველი კადრი ბევრ უცხოურ მედიაშიც გავრცელდა. გენრი დოლიძე არ უარყოფს, რომ გარკვეულწილად ამ ფაქტმაც განაპირობა, რომ დღეს ალეკო ელისაშვილის პარტიის – „მოქალაქეები“, ბათუმის მაჟორიტარობის კანდიდატია საქართველოს პარლამენტში. რა გეგმები აქვს მას საკანონმდებლო ორგანოში და რა საარჩევნო დაპირებებს გასცემს? – „ბათუმელების“ კითხვებს განრი დოლიძე პასუხობს:
- ბატონო გენრი, როგორ ფიქრობთ, პარლამენტში მაჟორიტარობის კანდიდატად რომ ხართ წარდგენილი, ამ ერთი კადრის „დამსახურება“ ხომ არ არის?
გენრი დოლიძე. თბილისი. 20.11.2019 წელი
ჩვენს მოძრაობაში მე მანამდეც ვიყავი ბათუმის წარმომადგენელი და დიდი ალბათობით ალბათ მაინც მე ვიქნებოდი ბათუმის წარმომადგენელი. თუმცა ამან ბევრი რამ შეცვალა იმ კუთხით, რომ ეს იყო ჩემი მხრიდან უკვე წყალგამყოფი ნაბიჯი პროსახელისუფლებო ადამიანებთან. ამით სრულად გავემიჯნე ნეიტრალურ დამოკიდებულებებს, აბსოლუტურად ლუსტრაცია მოვახდინე ხელისუფლების და მათთვის ავტომატურად ვიქეცი მტრად, რომელმაც მოახდინა საერთაშორისო დონეზე მათი მხილება – ეს ფოტო ძალიან გავრცელდა და ალბათ შთამბეჭდავი იყო, როცა სახელმწიფო მშვიდობიან დემონსტრანტს თავზე გადაუვლის. დიახ, ვფიქრობ, ეს იყო ერთ-ერთი ნაბიჯი, რამაც იმოქმედა ჩემს პოლიტიკურ იმიჯზე, გუნდში პოზიციების გამყარებაზე და ასე შემდეგ.
- შეგიძლიათ დამისახელოთ ბათუმისთვის მნიშვნელოვანი სამი მთავარი პრობლემა, რომელზეც საკანონმდებლო მიმართულებით აპირებთ მუშაობას პარლამენტში?
პირველი პრობლემა ეს არის დეცენტრალიზაციის არარსებობა. ბათუმი არ არის საკუთარი ბედის გადამწყვეტი და წლების განმავლობაში ბათუმს არ ჰყოლია მაჟორიტარი, რომელიც პარლამენტში თუნდაც ბათუმის ერთ პრობლემას გააჟღერებდა. გვყავს მდუმარე მაჟორიტარები.
- ეს არ არის საკანონმდებლო ხარვეზი, მათ კანონი ხმის ამოღებას არ უკრძალავს.
დიახ, კანონმა უნდა მოაგვაროს, პარლამენტმა უნდა მოაგვაროს, მეტი დეცენტრალიზაცია უნდა მისცეს. ამ შემთხვევაში არსებობს ისეთი პრობლემები და გამოწვევები, რომლებიც არის მუდმივი და რომლებიც დროში ცვალებადია. ისეთი საკითხებია, რომლებიც შეიძლება ამ წუთში არ ჩანდეს, მაგრამ ამას სჭირდება ადეკვატური რეაგირება პარლამენტის მხრიდან. ჩვენი პრობლემა არის ის, რომ … ეს შეიძლება თვითმმართველობას ეხებოდეს, არის ელიტური კორუფცია… მოგეხსენებათ „რივიერას“ ირგვლივ განვითარებული მოვლენები, ის საკითხები, რომლებიც თვითმმართველობის საკითხს სცდება, მიუხედავად იმისა, რომ სწორი ურბანული განვითარება მერიის კომპეტენციაა, მაინც საჭიროა, თუნდაც საპარლამენტო კომისიის შექმნა.
ჩემი აზრით, „რივიერას“ და სხვა ბევრ შემთხვევაში არსებობდა მაგის საჭიროება. პარლამენტში ჩვენი მაჟორიტარები კი დუმდნენ.
- ეს ალბათ მათი ინდივიდუალური პრობლემაა, ეს ხომ საკანონმდებლო დონეზე ვერ მოგვარდება?
იმიტომ არ იღებენ ხმას, რომ გუნდის ნაწილი, ამ კორუმპირებული სისტემის ნაწილი არიან. ჩვენ არა ვართ ხელისუფლების ნაწილი, ჩვენ ვართ მებრძოლი გუნდი, ვიბრძვით გარედან. ვაპირებთ ვიბრძოლოთ შიგნიდანაც – უფრო მეტი ბერკეტი, მეტი შესაძლებლობა გვექნება ამისთვის.
- ეს ყველაფერი მესმის, მაგრამ მე მაინტერესებდა, რაიმე საკანონმდებლო ხარვეზები თუ გაქვთ მონიშნული, რაზეც გინდათ მუშაობა, რითაც ამომრჩევლის მდგომარეობა რეალურად გაუმჯობესდება?
ეს დამოკიდებული იქნება იმაზე, რა პოზიციაში ვიქნებით ჩვენ. რა თქმა უნდა, გვაქვს ჩანიშნული, პირველ რიგში რა საკანონმდებლო ინიციატივები გვექნება. თუმცა მოცემულობა არის ცვალებადი და ჩვენი პრინციპები უცვლელი – მე შემიძლია ვთქვა რა პრინციპით ვიხელმძღვანელებ პარლამენტში, თუმცა ყველა საკანონმდებლო ინიციატივას წინასწარ ვერ ჩამოვთვლით. ეს დამოკიდებული იქნება იმაზე, თუ რა შემადგენლობით შევალთ პარლამენტში. ვიქნებით კოალიციაში ოპოზიციურ ფლანგთან თუ არა.
- ერთი დამისახელეთ, არ მინდა ყველას ჩამოთვლა.
მაგალითად, ჩვენ გამოვალთ ინიციატივით, რომ შემცირდეს პარლამენტში დეპუტატების რაოდენობა, ასამდე გვინდა, რომ დეპუტატების რაოდენობა შემცირდეს. ასევე გვინდა, რომ ბიუროკრატია შემცირდეს სახელმწიფოში და ამას დავუჭერთ მხარს. ამის გარდა, მხარს დავუჭერთ ადმინისტრაციული ხარჯების შემცირებას. მოვითხოვთ პარლამენტარებისთვის პრივილეგიების შემცირებას.
მაჟორიტარი არ გახლავთ თვითმმართველი ორგანოს წარმომადგენელი – ეს არის ადგილობრივი საზოგადოების მიერ არჩეული ადამიანი, რომელიც ცენტრალურ პოლიტიკას განსაზღვრავს. შესაბამისად, გვაქვს კონკრეტული ხედვები, თუნდაც თავდაცვის და უსაფრთხოების, განათლების, სოფლის მეურნეობის მიმართულებით, რასაც ჩვენ მხარს დავუჭერთ. კონკრეტული საკანონმდებლო ინიციატივები დამოკიდებული იქნება იმაზე, ფართო მხარდაჭერა გვექნება თუ ვიქნებით ოპოზიციაში.
- გაწერილი პროგრამა გაქვთ თუ მხოლოდ ზეპირი აგიტაციით შემოიფარგლებით?
მე, როგორც ბათუმის მაჟორიტარს, მექნება ჩემი ხედვები. მოგეხსენებათ, ჩვენ დაახლოებით ერთი თვის წინ დავრეგისტრირდით პარტიად, შესაბამისად, არის კონკრეტული სფეროები, რომლებზეც ჩვენ მკაცრად სტრუქტურირებული პროგრამა არ გაგვაჩნია. არის ხედვები, რომლებზეც უფრო მეტად გვიმუშავია, შესაბამისად, მექნება ჩემი ზოგადი ხედვები და ასევე გვექნება პარტიის ზოგადი ხედვები – საერთო კონცეფცია, რომელსაც აუცილებლად გამოვაქვეყნებთ, დავბეჭდავთ გაზეთსაც და მივაწვდით ყველა დაინტერესებულ მოქალაქეს.
- წესით ამომრჩეველმა უნდა იცოდეს, რას საქმიანობთ პოლიტიკაში აქტიურობის პარალელურად, რა შემოსავლით ცხოვრობთ?
ყველამ იცის, რომ ვარ ერთ-ერთი სოციალურად აქტიური მწერალი, მაქვს საკმაოდ ნორმალური ჰონორარებიც. ამის გარდა, მეუღლესთან ერთად მაქვს ივენთკომპანია, საიდანაც გვაქვს ასევე შემოსავალი. თუმცა კორონავირუსის დროს საკმაოდ დაზიანდა ჩვენი საოჯახო ბიზნესი და არასახარბიელო მდგომარეობაში აღმოვჩნდით. ასევე ჩემს ოჯახს აქვს მცირე საოჯახო ბიზნესი, თუმცა ძირითადად მაინც ვარ მწერალი, დრამატურგი და პოეტი, ეს არის უფრო საინტერესო საქმიანობა ჩემი ცხოვრების.
- მარუხის ქუჩაზე იყავით გასული და შეხვდით იმ მოქალაქეს, რომელმაც სახლის ნაწილი ქუჩაზე ააშენა. თქვენ წერდით, რომ მედალს ორი მხარე აქვს – მინდა უფრო კონკრეტულად გვითხრათ – რას გულისხმობდით. ისე გამოჩნდა, თითქოს არ მიანიჭეთ მნიშვნელობა იმას, რომ შენობა უნებართვოდაა აშენებული, თუნდაც კერძო საკუთრებაში?
არა, არა, როგორ გეკადრებათ. მე ვთქვი, რომ როცა გავედი ორი ლეგიტიმური კითხვა მამოძრავებდა, ერთი – იყო თუ არა ტროტუარზე აშენებული, ეს ძალიან მნიშვნელოვანია, რადგან თუ სავალ ნაწილზე აშენებს ადამიანი, აქ იყო ძალიან დიდი განგაშის ზარები შემოსაკრავი. მეორე – იყო თუ არა ეს უკანონო მშენებლობა. პირველი, რაც მოსახლეობასთან საუბრის დროს დავადგინეთ, ეს იყო ყოველთვის ღობე, კერძო ტერიტორია, მისი ეზო. საერთოდაც, როგორც ამიხსნეს, მანდ ჩიხი იყო და მერე გაიჭრა ის ვიწრო ქუჩა. რაც შეეხება კანონიერებას – ვთქვი, რომ ამაზე ველოდებოდით მერიის პასუხს. მერიამ გამოაქვეყნა, რომ ეს იყო უკანონო და ეს დანაშაულია.
როცა ადამიანს ვაბრალებთ, რომ მანქანის სავალ ნაწილზე ააშენა და ეს ასე არ არის… სიმართლე იყო ჩემთვის მნიშვნელოვანი. ორი აზრი არ არსებობს, რომ კანონი უნდა ეხებოდეს ყველას. ცივილურ სამყაროში ეს შეიძლება ეხებოდეს, როგორც დეველოპერულ კომპანიას, ასევე მოქალაქეს.
- ლგბტ თემი ხშირად საუბრობს, რომ დაუცველია საქართველოში. გაუწევთ ლობირებას პარლამენტიდან საკითხებს, რაც მათი უსაფრთხოებისთვის იქნება მნიშვნელოვანი?
ჩემი და ჩემი გუნდის ხედვაც ასეთია, რომ საქართველოში არცერთი ჯგუფი არ უნდა იყოს დისკრიმინირებული.
- ყოველთვის ასე ფიქრობდით? მე მახსოვს წლების წინ, როცა ბათუმში თითქოს გეიპარადის ჩატარება იგეგმებოდა და მოქალაქეები ამ „პარადის ჩასაშლელად“ ქუჩებში გამოვიდნენ. თქვენ მახსოვხართ ერთ-ერთი ასეთი შეკრებიდან, მაშინ ლექსიც წაიკითხეთ. ეს იმიტომ გავიხსენე, რომ მინდოდა მეკითხა, წლების შემდე რა გადააფასეთ?
ვერ ვიხსენებ ასეთ შეხვედრას, ვერც იმას, რომ რაიმე ლექსი წამეკითხოს. ადამიანის შეხედულებები, რათ თქმა უნდა, იცვლება… ნებისმიერ დროს, ნებისმიერ სიტუაციაში ძალადობა ჩემთვის მიუღებელია.
