Batumelebi | როგორ დავახვნევინოთ მიწა უფასოდ – ნახევარმილიონიანი პროგრამა აჭარაში როგორ დავახვნევინოთ მიწა უფასოდ – ნახევარმილიონიანი პროგრამა აჭარაში – Batumelebi

როგორ დავახვნევინოთ მიწა უფასოდ – ნახევარმილიონიანი პროგრამა აჭარაში

აჭარის მთავრობის გეგმით აჭარაში ფერმერებს ჯამში 2 580 ჰექტარი მიწა უფასოდ უნდა დაუხნან. ამისთვის აჭარის ბიუჯეტში ნახევარი მილიონი ლარია გათვალისწინებული. ტექნიკით მომსახურებას კი, აგროსერვისცენტრი გამარტივებული წესით შეისყიდის.

ცენტრის ინფორმაციით, „რეგიონის კლიმატური პირობებიდან და რელიეფიდან გამომდინარე, საგაზაფხულო სამუშაოებისთვის მიწის დამუშავება უნდა განხორციელდეს, არაუგვიანეს 5 ივნისისა. აჭარის რეგიონში არსებული მიწის ფონდიდან 9 000 ჰექტარი არის სახნავი, აქედან სამექანიზაციოდ შერჩეულია 2 580 ჰექტარი მუნიციპალიტეტების მიხედვით“.

ხელშეკრულება სახელმწიფო შპს „მექანიზატორთან“ გაფორმდება მთლიან თანხაზე, თუმცა, ანაზღაურება მოხდება ფაქტობრივად დამუშავებული ფართობების მიხედვით – გვითხრეს სერვისცენტრში.

„ყველა ფართობი დაიხვნება მუნიციპალიტეტებში. ფერმერისგან რაიმე მომართვა არ სჭირდება. სოფელში შედის ტრაქტორი, ამის შესახებ ინფორმირებული არიან და მიჰყავთ და ახვნევინებენ. თითოეულ სოფელში მინიმუმ 2 დღე მაინც დარჩება ტექნიკა. მუნიციპალიტეტები გაფრთხილებულია, მერის რწმუნებულები არიან მობილიზებულნი, რომ ყველა მოსახლე აღრიცხონ, რამდენი ფართობი აქვთ, გააფრთხილონ, რომ ეს პროგრამა მუშაობს და ჩართონ ყველა მოქალაქე. ამასთან, ამა თუ იმ მოქალაქეს თუ, ვთქვათ, არ უნდა მიწის დახვნა, არ არის აღრიცხული წინასწარ, მაგრამ შევიდა სოფელში ტრაქტორი და ვთქვათ, მოუნდა მიწის დახვნა, ამ შემთხვევაშიც უპრობლემოდ და უფასოდ დაუხნავენ მიწას ყველას“, – გვითხრა აგროსერვისცენტრის დირექტორმა გოჩა ბერიძემ.

მიწის (უფასო) ხვნის პროგრამა 2020 წლის 30 აპრილს დამტკიცდა და ის აჭარის მთავრობის ანტიკრიზისული გეგმის ნაწილია.

ამ თემაზე:

578 ათასი ლარი აჭარის ფერმერებისთვის მიწის უსასყიდლოდ დასახნავად

 

მთავარი ფოტო: აჭარის სოფლის მეურნეობის სამინისტროს ფეისბუქგვერდიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com