Batumelebi | ჩვენმა სეკულარულმა სახელმწიფომ მუხლებზე იხოხა საპატრიარქოს ტერორისტებთან – პაატა შამუგია ჩვენმა სეკულარულმა სახელმწიფომ მუხლებზე იხოხა საპატრიარქოს ტერორისტებთან – პაატა შამუგია – Batumelebi

ჩვენმა სეკულარულმა სახელმწიფომ მუხლებზე იხოხა საპატრიარქოს ტერორისტებთან – პაატა შამუგია

დღეს გადაწყდა, რომ აღდგომის დღესასწაულზე საპატრიარქო დღესასწაულის აღნიშვნის წესს არ შეცვლის, მრევლი ტაძრებში კომენდანტის საათის დადგომამდე შეიკრიბება და დილის 6 საათამდე დარჩება. ინფექციონისტმა პაატა იმნაძემ კი ცოტა ხნის წინ სატელევიზიო ეთერით მოუწოდა ხალხს დარჩნენ სახლში დღესასწაულზე, რათა ავირიდოთ თავიდან კორონავირუსით გამოწვეული იტალიის მსგავსი მაგალითები.

საპატრიარქომ საკუთარ გადაწყვეტილებას „შეღავათი“ უწოდა, ხელისუფლებამ კი „შეთანხმება“. TV პირველზე თამარ ჩიხლაძის ღამის ეთერში  დღეს ამ გადაწყვეტილებაზე პენცენტრის პრეზიდენტმა, პოეტმა პაატა შამუგიამ ისაუბრა:

„სასწორის ერთ პინაზე ადამიანების სოცოცხლე და ჯანმრთელობა დგას, მეორეზე კონკრეტული ორგანიზაციის რქიანობა და სიჯიუტე. იმუნოლოგმა პაატა იმნაძემ გარკვევით თქვა თუ წახვალთ ეკლესიაში კუბოებს ვეღარ დავითვლითო, მეტი რა უნდა ქნას, ხომ არ გვაგინებს? სპეციალისტი გვეუბნება, რომ ეპიდაფეთქება იქნება. რას ფიქრობენ მღვდლები, მიტროპოლიტები და ისინი, ვისაც ათასი ტიტულატურა აქვს ხორციელი მოთხოვნილებების დასაკმაყოფილებლად?

სახელმწიფო პრაქტიკულად გაგვიუქმდა. გახსოვთ შს მინისტრი ჭიკაიძე, რომელსაც თალიბანი ადამიანი ეგონა? ამაზე უარესი თქვა გუშინ პრემიერმა გახარიამ რომ საქართველო მართლმადიდებლური სახელმწიფოა. პრემიერმინისტრმა არ იცის, როგორი სახელმწიფოს მეთაურია – საქართველო სეკულარული სახელმწიფოა, რაც კონსტიტუციაში დეტალურად გვაქვს გაწერილი, რა უნდა პრემიერად ადამიანს, რომელმაც ისიც კი არ იცის როგორი კონსტიტუციური მოწყობის ქვეყანაა საქართველო? რატომ დავისაჯეთ ასე ასეთი ხეპრეები რომ გვყავს ხელისუფლებაში ვერ ამიხსნია.

უარესი თქვეს სხვებმაც – შინაგან საქმეთა მინისტრი ჟურნალისტებს ეკითხებოდა იქნებოდა თუ არა დარღვევა მრველი თუ ღამით 9 საათზე შევიდოდა ეკლესიაში და დილის 6-ზე გამოვიდოდა. ანუ მან არ იცის, რომ საგანგებო რეჟიმით სამ ადამიანზე მეტის შეკრება დაუშვებელია.

საპატრიარქოს სიჯიუტე ეკლესიის რეიტინგს ჩააქვესკნელებს, უამრავი ადამიანი დარჩება ერთადერთი ეგზისტენციური საყრდენის გარეშე. შიმშილისგან, გაჭირვებისგან, პირადი და საზოგადო ტრაგედიებისგან გამოფიტულ ადამიანებს ის ერთადერთი ღერძიც გამოეცლებათ, რაც ეკლესიაში ეგულებდათ და ეს ცარიელი ადგილები შეივსება გაცილებით უფრო სახიფათო რამეებით, მეტი რადიკალიზაციით, კრიმინალით, ნიჰილიზმით.

თუ ამ ვირუსებს გადავურჩით უნდა გვახსოვდეს და თაობებს უნდა შემოვუნახოთ, რომ ამ ყველაფრის, ამ უბედურებების ერთ-ერთი მიზეზი არის ჩვენი უმდიდრესი და უნეტარესი საპატრიარქო და ჩვენი ჩასვრილი ხელისუფლება, რომელიც მშვიდობიან ხალხთან არის სასტიკი და ბრუტალური, თავისზე რქიანებთან კი მუხლებზე ხოხავს. ჩვენ დავინახეთ, ჩვენმა სეკულარულმა სახელმწიფომ როგორ იხოხა მუხლებზე (საპატრიარქოს) ტერორისტებთან. სასწორზე ადამიანის სიცოცხლეს დებენ“.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com