დღეს, 20 მარტს, კორონავირუსის გავრცელებასთან დაკავშირებულ პრესკონფერენციაზე, დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, რომ გეოგრაფიული ხელმისაწვდომობა ტესტირებაზე უფრო გაიზრდება, რათა ეს პროცესი ხელმისაწვდომი იყოს კლინიკებისა და მოსახლეობისთვის.
„საქართველოში სამედიცინო დაწესებულებების 80% კერძოა, მათ საკმაოდ კარგი ლაბორატორიები აქვთ – იქნება ეს PCR ანუ მოლეკულურ ტექნოლოგიაზე დამზადებული ტესტირება თუ სწრაფი ტესტების ჩატარება. მათ თავისუფლად შეუძლიათ ეს,” – განაცხადა გამყრელიძემ.
გამყრელიძის თქმით, პრემიერ-მინისტრმა ჯანდაცვის სამინისტროს დაავალა, განსაზღვროს კერძო ლაბორატორიებში ჩასატარებელი ტესტის ფასი, რომელსაც სახელმწიფო გადაიხდის.
„პრემიერ-მინისტრმა მისცა დავალება ჯანდაცვის სამინისტროს, რომ დადგინდეს ტესტირების ფასი, რომელსაც სახელმწიფო უზრუნველყოფს, იმიტომ, რომ ეპიდემიების დროს ტესტირებების კომერციალიზაცია არ ხდება. დღეს ჩვენ გვაქვს პანდემია მსოფლიოში. ამ დროს ყველაფერს თავის თავზე იღებს სახელმწიფო, რათა ადამიანებისთვის ტესტირება იყოს ფინანსურად ხელმისაწვდომი. განისაზღვრება ოპტიმალური ფასი, რაც არის დღეს ბაზარზე: სწრაფი ტესტის, ანტიგენზე დამყარებულის, ანტისხეულზე დამყარებულის, PCR-ის და შესაბამისად, ყველა ლაბორატორიას, რომელსაც შეუძლია ტესტირების ჩატარება, ამის უფლება ექნება და ამას აანაზღაურებს შესაბამისი სახელმწიფო პროგრამა,” – განაცხადა გამყრელიძემ.
ამირან გამყრელიძემ ასევე ისაუბრა საქართეველოში ახალი, სწრაფი ტესტების შემოტანასთან დაკავშიერებით:
„ამ საკითხებზე მიღწეული იქნა კონსესუსი დღეს დამსწრე ექსპერტებთან, მათ შორის, რამდენიმე კერძო ლაბორატორიის წარმომადგენელთან. ჯანდაცვის სამინისტრო ყველანაირად შეუწყობს ხელს, რომ რაც შეიძლება სწრაფი რეჟიმით მოხდეს მათი იმპორტირება ქვეყანაში, რომ ისინი უფრო ხელმისაწვდომი გახდეს სამედიცინო ქსელში, რადგან ტესტის გაკეთება ექვემდებარება რეცეპტის გამოწერას და ტესტი უნდა ჩაუტარდე იმას, ვისაც ექიმი ჩათვლის საჭიროდ, რომ გაიტესტოს”.
ამირან გამყრელიძემ აღნიშნა, რომ ქვეყანაში დღეისთვის გამოკვლეულია 1126 ნიმუში და არც ერთ შემთხვევაში, უარი არ თქმულა ტესტის ჩატარებაზე, როცა ეს საჭირო იყო და ტესტების რესურსი საქართველოს აქვს.
„გასაგებია ჩემთვის, რომ მოსახლეობისგან მოთხოვნა უფრო მეტია და ინტენსიურად ვმუშაობთ, რომ ქვეყანას, გარდა PCR ტექნოლოგიებისა, ჰქონდეს სწრაფი ტესტები და ამასთან დაკავშირებით სერიოზული მუშაობა მიდის, რომ სწრაფად იქნეს რეგისტრირებული და შემოტანილი ქვეყანაში ეს ტესტები. ყოველდღე შემოდის ათამდე განცხადება კომპანიებისა, ტესტების მოწოდებასთან დაკავშირებით და ლუგარის ცენტრის პერსონალი აანალიზებს მათ, ეს ინფორმაცია გადაცემული აქვს სამინისტროს, რადგან სამინისტრო აპირებს ცენტრალიზებულად მთელი რიგი ტესტების შეძენას. მოლაპარაკებები მიმდინარეობს ჩინეთთან და კორეასთან. ჩინეთმა გვაჩუქა გასულ კვირას ძალიან სერიოზული აპარატურა PCR ტექნოლოგიების და მომავალ კვირაში ამ დახვეწილი ტექნოლოგიების 1000 ტესტს გადმოგვცემს,“ – განაცხადა ამირან გამყრელიძემ.
20 მარტის ოფიციალური მონაცემებით, საქართველოში კორონავირუსით ინფიცირების შემთხვევები 43-მდე გაიზარდა. აქედან გამოჯანმრთელებულია ერთი. კარანტინის რეჟიმში ამ დროისთვის იმყოფება 1575 ადამიანი, სტაციონარში მეთვალყურეობის ქვეშ კი – 275.
