განათლების სამინისტროს ინფორმაციით, საჯარო სკოლის დირექტორობის მსურველებისთვის კონკურსის პირველი ეტაპი 2023 წლის 22 იანვარს დაიწყება.
ტესტირება ელექტრონული ფორმით, ერთ სესიად ჩატარდება. ტესტირება დაიწყება 12:00 საათზე. ტესტირების ხანგრძლივობა 5 საათია. „მხედველობის პრობლემის მქონე დირექტორობის მსურველებს კიდევ 30 წუთი მიეცემათ“.
სამინისტროს ინფორმაციით, დირექტორობის მსურველები საგამოცდო ცენტრში რეგისტრაციისათვის ტესტირების დაწყებამდე ერთი საათით ადრე უნდა გამოცხადდნენ. დაგვიანების, პირადობის მოწმობის ან პასპორტის არქონის შემთხვევაში აპლიკანტები ტესტირებაზე არ დაიშვებიან.
„ტესტირებაში მონაწილეობა შეუძლიათ იმ პირებს, რომლებმაც 2020 წლის 3 თებერვლიდან 17 თებერვლის ჩათვლით და 2022 წლის 24 ოქტომბრიდან 16 დეკემბრის ჩათვლით გაიარეს რეგისტრაცია.
ამასთან, განცხადებით არ მოითხოვეს რეგისტრაციის გაუქმება და რეგისტრაციისათვის გადახდილი თანხის უკან დაბრუნება“.
ტესტირების წარმატებით გავლის შემთხვევაში დირექტორობის მსურველები გადავლენ სერტიფიცირების მომდევნო ეტაპზე, რომელიც გასაუბრებას გულისხმობს.
