ნეტგაზეთი • RU

ბათუმში 350-მდე სამეთვალყურეო ვიდეოკამერის მოვლისთვის ბიუჯეტიდან 320 ათასი ლარი დაიხარჯება

ქალაქ ბათუმის ტერიტორიაზე განთავსებული ვიდეო-სამეთვალყურეო სისტემის მოვლა-პატრონობისთვის ბიუჯეტიდან, 2020 წელს, 320 ათასი ლარი დაიხარჯება. ბათუმის მერია ტენდერში მონაწილე კომპანიასთან გასაფორმებელ ხელშეკრულებას ამზადებს.

სატენდერო თანხა 390 ათასი ლარი იყო, შპს „დელტა კონსალტინგი“ კი მერიას მომსახურებას 320 ათას 12 ლარად სთავაზობს.

ტენდერის მონაცემებით, გამარჯვებულმა კომპანიამ უნდა უზრუნველყოს ბათუმის ტერიტორიაზე განთავსებული ვიდეო-სამეთვალყურეო სისტემის მოვლა-პატრონობა, რაც მოიცავს:

  • „ა“ ტიპის ვიდეო-სამეთვალყურეო კამერის კომპლექტს – 215 ერთეული IP კამერა (Pelco IXE31, გარე გამოყენების ჰაუსინგით), 195 ერთეული ჩართვის წერტილი (უწყვეტი კვებით მომარაგების სისტემა);
  • „ბ“ ტიპის ვიდეო-სამეთვალყურეო კამერის კომპლექტს – ავტოსატრანსპორტო საშუალების სახელმწიფო ნომრის ამომცნობი ვიდეო-სამეთვალყურეო კამერ(ებ)ის მოვლა-პატრონობა. კომპლექტი მოიცავს Avigilon- ის წარმოების ვიდეო-სამეთვალყურეო კამერასა და AETEK-ის გარე გამოყენების კორპუსს, წყლის მიწოდების სისტემასა და ინფრაწითელ განათებას.
  • სასერვერო ინფრასტრუქტურის, როგორც ერთიანი ვიდეო-სამეთვალყურეო სისტემის განუყოფელი ნაწილის მოვლა-პატრონობას.

ავტოსატრანსპორტო საშუალების სახელმწიფო ნომრის ამომცნობი [„ბ“ ტიპის] ვიდეო-სამეთვალყურეო კამერის რაოდენობად მითითებულია: 2020 წლის თებერვალში – 114, ხოლო ამავე წლის დეკემბერში – 150.

ბათუმის მერიას მხოლოდ „ა“ ტიპის ვიდეო-სამეთვალყურეო კამერების მოვლა-პატრონობაზე [2018 წლის ივლისიდან 2019 წლის 25 დეკემბრამდე პერიოდისთვის] ხელშეკრულება ამავე კომპანიასთან 399 ათას 124 ლარზე ჰქონდა გაფორმებული. „დელტა კონსალტინგი“, თბილისში, 2014 წელს რეგისტრირებული კომპანიაა.

ამ თემაზე:

რაში იყენებს მერია 215 ვიდეოთვალს ბათუმის ქუჩებში

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com