ბათუმი,მთავარი,მთიანი აჭარა,სიახლეები

ბათუმის მერია 293 კამერას ყიდულობს, 3 სკვერში კი სამეთვალყურეო სისტემას აწყობს

16.08.2022 • 1227
ბათუმის მერია 293 კამერას ყიდულობს, 3 სკვერში კი სამეთვალყურეო სისტემას აწყობს

ბათუმის მერიას მიმდინარე წლის ბოლომდე 293 ვიდეო-სამეთვალყურეო კამერის შესყიდვა და ქალაქის სხვადასხვა ადგილას დამონტაჟება აქვს დაგეგმილი. მერია ქალაქის სამ სკვერში ვიდეო-სამეთვალყურეო სისტემისთვის მიწისქვეშა ინფრასტრუქტურის მოწყობასაც გეგმავს.

კამერების შეძენა-მონტაჟზე, ასევე, სკვერებში მიწისქვეშა ინფრასტრუქტურის მოწყობაზე, ტენდერი მერიის საქალაქო ინფრასტრუქტურისა და კეთილმოწყობის სამმართველომ გამოაცხადა. სატენდერო თანხა 1 მილიონ 489 ათას 778 ლარია.

პირობის მიხედვით, ტენდერში გამარჯვებულმა „უნდა უზრუნველყოს ბათუმის ტერიტორიაზე ვიდეო-სამეთვალყურეო კამერების მიწოდება-მონტაჟი და ვიდეონაკადის [სტრიმის] უზრუნველყოფა/ტრანსპორტირება ბათუმში მდებარე სასერვერომდე [ანგისა] და  თბილისის [სსიპ 112] მონაცემთა დამუშავების ცენტრებამდე მიღება-ჩაბარების აქტის გაფორმებიდან 12 თვის განმავლობაში“.

ამასთან, „შესყიდვის ობიექტზე უნდა გავრცელდეს ერთწლიანი ტექნიკური მხარდაჭერის მომსახურება [ადგილზე], რომელიც აითვლება მიღება-ჩაბარების აქტის გაფორმებიდან. პრეტენდენტმა რეაგირება უნდა მოახდინოს ელფოსტის ან/და სატელეფონო შეტყობინებიდან 24 საათის განმავლობაში.“

რაც შეეხება ვიდეო-სამეთვალყურეო სისტემისთვის მიწისქვეშა საკომუნიკაციო ინფრასტრუქტურას, ის უნდა მოეწყოს ბათუმის ცენტრალურ პარკში მდებარე სკვერში, ანწუხელიძის სახელობის სკვერში, ასევე ღვთისმშობლის ეკლესიასთან არსებულ სკვერში.

ვიდეო-სამეთვალყურეო სისტემის, მათ შორის, მიწისქვეშა საკომუნიკაციო ინფრასტრუქტურა უნდა მოეწყოს არაუგვიანეს 2022 წლის 25 დეკემბრისა.

ტენდერში წინადადებების მიღება 2022 წლის 14 სექტემბერს დაიწყება და 19 სექტემბერს დასრულდება,

გადაბეჭდვის წესი


ასევე: