Batumelebi | ხვალ ბათუმში „ხმის მიცემის შაბათი“ და ფრანების შოუ გაიმართება – „შენი იდეა ბათუმს“ ხვალ ბათუმში „ხმის მიცემის შაბათი“ და ფრანების შოუ გაიმართება – „შენი იდეა ბათუმს“ – Batumelebi

ხვალ ბათუმში „ხმის მიცემის შაბათი“ და ფრანების შოუ გაიმართება – „შენი იდეა ბათუმს“

14 დეკემბერს, შაბათს, თანამედროვე ხელოვნების სივრცეში პროექტის – „შენი იდეა ბათუმს“ – „ხმის მიცემის შაბათი“ გაიმართება.

ღონისძიება 11 საათზე დაიწყება და 2 ნაწილისგან შედგება.

პირველი ნაწილი სრულად დაეთმობა ხმის მიცემის ეტაპზე გადასულ იდეებს. იდეების ავტორები აუდიტორიის წინაშე თავად მოახდენენ იდეების პრეზენტაციას.

მეორე ნაწილში კი პროექტის მონაწილებითი ბიუჯეტის განხორციელებასთან დაკავშირებული ძირითადი ასპექტები განიხილება. მოწვეულ სპიკერებთან ერთად მოხდება პროცესის მნიშვნელოვანი გამოწვევების გაანალიზება ფინანსური, სამართლებრივი და საზოგადოებასთან ურთიერთობის ჭრილში.

მოწვეულ მომხსენებლებს შორის იქნებიან: დავით ხოსრუაშვილი (სათეფა), გიორგი ხარებავა (ჯეპრა), ლიზი სოფრომაძე (რეგიონის განვითარების ცენტრი) .

მთელი დღის განმავლობაში (11:00- 21:00) ასევე მოეწყობა ხმის მიცემის ეტაპზე გადასული იდეების გამოფენა, ღია რეგისტრაცია და ხმის მიცემა.

ღონისძიების ფარგლებში, 14:00 საათიდან დაიწყება ფრანების შოუ. ფრანებს გაუშვებენ 2019 წლის “შენი იდეა ბათუმს” გამარჯვებული პროექტის ავტორები.

პროექტის ფარგლებში ხმის მიცემის ეტაპზე გადასულია 6 იდეა, რომელიც მოქალაქეების ხმას ელიან. გამარჯვებისთვის იდეებმა უნდა მოაგროვონ ხმათა მინიმალური რაოდენობა, რაც ბათუმში რეგისტრირებული მოსახლეობის 0,5 % -ი, დაახლოებით 700 ხმაა.

ხმის მიცემა მიმდინარეობს ონლაინ, ვებგვერდზე idea.batumi.ge და გაგრძელდება 21 დეკემბრამდე. თითოეულ მოქალაქეს საშუალება აქვს ხმა მისცეს 3 იდეას.

ხმის მისაცემად აუცილებელია პირველადი რეგისტრაციის გავლა, რომელიც მიმდინარეობს ბათუმის მერიაში, მერიის 14 სერვის ცენტრში ან ონლაინ www.idea.batumi.ge (საჭიროა ელექტრონული ხელმოწერა).

პროექტს „შენი იდეა ბათუმს“  ახორციელებს ბათუმის მერია და ბათუმის მუნიციპალური სერვისების სააგენტო. მხარდამჭერები:  ამერიკის შეერთებული შტატების საერთაშორისო სააგენტოს (USAID) დემოკრატიული მმართველობის ინიციატივა (GGI), პური მსოფლიოს (BftW) და სამოქალაქო საზოგადოების ინსტიტუტი.

__________
ფოტო „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com