6 ივნისს საფრანგეთის პრეზიდენტმა ემანუელ მაკრონმა განაცხადა, რომ საფრანგეთი უკრაინას Mirage-2000-5 გამანადგურებლებს გადასცემს, მოამზადებს უკრაინელ პილოტებს და მონაწილეობას მიიღებს უკრაინელი სამხედროების მომზადების პროგრამაში.
Mirage 2000-5 ერთადგილიანი გამანადგურებელია, რომელიც ექსპლუატაციაში შევიდა 1999 წელს. იგი აღჭურვილია მაღალი ხარისხის რადარით და გააჩნია ერთდროული სროლის შესაძლებლობა რამდენიმე სამიზნეზე.
ამ ეტაპზე არ სახელდება გამანადგურებლების ზუსტი რაოდენობა.
მაკრონმა BFMTV-თან ინტერვიუში განაცხადა, რომ საფრანგეთი უკრაინას შესთავაზებს 4500 უკრაინელი ჯარისკაცის მომზადებას.
დღეს, 7 ივნისს, მაკრონი მოლაპარაკებებს გამართავს პრეზიდენტ ზელენსკისთან პარიზში.
„ევროპეისკაია პრავდას“ ცნობით, პრეზიდენტები ხელს მოაწერენ ხელშეკრულებას, რომლის თანახმადაც საფრანგეთი უკრაინას 650 მილიონი ევროს ოდენობის სესხებსა და გრანტებს აძლევს ადგილობრივი ხელისუფლებისა და კრიტიკული ინფრასტრუქტურის მხარდასაჭერად, განსაკუთრებით კი ენერგეტიკის, რომელიც რუსეთის მუდმივი თავდასხმის სამიზნეა.
_____________
ფოტოზე: Mirage 2000-5
