Batumelebi | რა თქვა მოწმემ, რომელიც ერმაკოვთან შეხვედრას ესწრებოდა რა თქვა მოწმემ, რომელიც ერმაკოვთან შეხვედრას ესწრებოდა – Batumelebi

რა თქვა მოწმემ, რომელიც ერმაკოვთან შეხვედრას ესწრებოდა

“ბატონო პროკურორო, თქვენთან უფრო ვსინჯავდი მორიგებას, ვიდრე გიორგი ერმაკოვთან… ერმაკოვთან არც ღირს, რამე სცადო,” – აღნიშნა ჩვენების მიცემის დროს მოწმე ირაკლი ხარაძემ. პროკურატურის ვერსიით, იგი ბათუმის ყოფილი მერის – გიორგი ერმაკოვის მეგობარია და ესწრებოდა იმ ბიზნესმენის [კომპანია „კონვენტ ჯორჯიას“ მფლობელი] ქალაქის მერთან შეხვედრას, რომელსაც ბათუმში “იაფი სახლი” უნდა აეშენებინა.

“ბათუმის მერიის მაღალჩინოსნების საქმე” დასრულების ეტაპზეა. რამდენიმე სხდომის შემდეგ მოსამართლე დავით მამისეიშვილი საბოლოო გადაწყვეტილებას მიიღებს. დღევანდელ სხდომაზე გაირკვა ისიც, რომ ბრალდებულები სასამართლოს მოწმის სახით ჩვენებებს არ მისცემენ.

მოწმის სახით დაკითხულმა ირაკლი ხარაძემ მოსამართლეს უთხრა, რომ იგი გიორგი ერმაკოვის მეგობარი არ არის.

“ჩვენი მამები მეგობრობდნენ და კარგი ურთიერთობა ჰქონდათ… მე და გიორგი უბრალოდ ვიცნობთ ერთმანეთს, ვესალმებით, რესტორნებში არ დავდიოდით ერთად და არ ვძმაკაცობდით…” – თქვა ირაკლი ხარაძემ.

“თუ არ მეგობრობდით ერმაკოვთან და “იაფი სახლის” პროექტთანაც არანაირი შეხება არ გქონიათ, რატომ შეხვდით ერმაკოვს და არჩილ ვანაძეს ამ საქმეზე?” – დაინტერესდა პროკურორი რამაზ შავაძე. კითხვა რამდენიმე ადვოკატმა ერთდროულად გააპროტესტა.

“მან თქვა, რომ შემთხვევით გაყვა…” – აღნიშნა ადვოკატმა რამინ პაპიძემ. მან ხაზი გაუსვა იმასაც, რომ პროკურორის შეკითხვა დამაბნეველი იყო, რადგან შეხვედრა ერმაკოვთან “რამდენჯერმე” არ შემდგარა.

ადვოკატების შუამდგომლობა პროკურორის კითხვის განრიდებაზე მოსამართლემ არ დააკმაყოფილა და მოწმეს პასუხის გაცემისკენ მოუწოდა.

ირაკლი ხარაძემ განმარტა, რომ ის სხვა პროექტებში იყო ჩართული, რასაც “კონვენტ ჯორჯია” საქართველოში ახორციელებდა.

“ანარი [კომპანია „კონვენტ ჯორჯიას“ მფლობელი – ავტ.] ამბობდა თანხას არ მირიცხავენო… ეს როცა გაირკვევა, ბათუმის მშენებლობას მერე შენ ჩაგაბარებო, ასე მეუბნებოდა… თავდაპირველად შევხვდით არჩილ ვანაძეს. მე მხოლოდ თარჯიმანივით ვიყავი, რაც შეეხება ერმაკოვთან შეხვედრას, იქ სხვა თანამდებობის პირებიც იყვნენ… მე მოსასმენად ჩამოვედი იმ შეხვედრაზე მხოლოდ,” – თქვა ირაკლი ხარაძემ.

“მანამდე არ შეხვედრიხართ ერმაკოვს? არც ტელეფონზე გისაუბრიათ?” – ჩაეძია მოწმეს პროკურორი რამაზ შავაძე.

“ტელეფონით კი ვესაუბრე… რადგან ანარი ამბობდა, რომ ბათუმის მშენებლობას მე ჩამაბარებდა, მაშინ დავურეკე გიორგი ერმაკოვს და უბრალოდ ვკითხე, მას მართლაც ჰქონდა თუ არა მოგებული ეს ტენდერი…” – უპასუხა პროკურორს მოწმემ.

ირაკლი ხარაძის თქმით, გიორგი ერმაკოვის ბიზნესმენთან შეხვედრის ინიციატორი თვითონ არ ყოფილა.

“ვეუბნებოდი ანარს, მე რომ წამოგყვე, უარესი იქნება-მეთქი… მაინც დაიჟინა ანარმა, წამოდი, წამოდიო… საერთოდ, ანარი არავის აზრს არ ითვალისწინებდა”, – განაცხადა მოწმემ და პროკურორებს გახედა.

“არ ითვალისწინებდა და ორჯერ წაგიყვანათ საქმიანი ურთიერთობის გასარკვევად?” – უკან არ დაიხია პროკურორმა.

“გასარკვევად არა, მე იქ მოსასმენად მივედი,” – მიუგო პროკურორს ირაკლი ხარაძემ.

ირაკლი ხარაძე დაცვის მხარის მოწმეა. მან ჩვენების მიცემის დროს პროკურატურის მიერ წარდგენილ ერთ-ერთ მოწმეზე – ვახტანგ ჩიქოვანზეც ისაუბრა, რომელმაც თქვა, რომ “კონვენტ ჯორჯია” გიორგი ერმაკოვთან სწორედ ირაკლი ხარაძემ დააკავშირა. ვახტანგ ჩიქოვანიც “კონვენტ ჯორჯიას” თანამშრომელი იყო.

“ეს არაა სწორი, არ ვიცი, რატომ თქვა ეს…” – აღნიშნა დღევანდელ სხდომაზე ირაკლი ხარაძემ. მან ხაზი გაუსვა იმას, რომ ამ პროცესში ტენდერის მოგების შემდეგ ჩაერთო.

“საიდან გაქვთ ინფორმაცია, რომ მოწმე ჩიქოვანმა ეს თქვა სასამართლოში?” – იკითხა პროკურორმა ალექსანდრე ძირკვაძემ.

“ბათუმელებში” წავიკითხე,”- დასძინა მოწმემ.

ამ საქმეზე სულ 7 ბრალდებულია, თუმცა 24 სექტემბრის სხდომაზე სასამართლომ გირაოს საფუძველზე გაათავისუფლა: ბაგრატ მანველიძე, ბაგრატ ხალვაში, თენგიზ პეტრიძე და ვლადიმერ ხინთიბიძე. 16 ოქტომბრის სხდომაზე კი, მოსამართლე დავით მამისეიშვილმა ბათუმის ყოფილი მერი გიორგი ერმაკოვი, ასევე მერიის ყოფილი მაღალჩინოსნები: არჩილ ვანაძე და ეგარსლან ლომაძე წინასწარ პატიმრობაში დატოვა. მერიის ყოფილ მაღალჩინოსნებს ჯამში 1 მილიონ 376 ათასი ლარის გაფლანგვას ედავება პროკურატურა.

“ასე ჩავრჩით ჩვენ აქ”- გია ერმაკოვის რეპლიკა მოწმეს

ნეტგაზეთის მასალების სხვა გამოცემებში გადაბეჭდვის წესი
ავტორი